ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ՝  կանխամտածված սնանկության, ինչպես նաև  ՍՊ ընկերության տնօրենի կողմից հարկերը վճարելուց չարամտորեն խուսափելու դեպքի առթիվ:

Նախապատրաստված նյութերով պարզվել է, որ «Հայպեռլիտ» ՍՊ ընկերության տնօրեն Ա. Մկրտչյանը գույքային պարտականություններից խուսափելու նպատակով  ընկերությանը պատկանող 18 անուն սարքավորումները ձևականորեն օտարել է և ստեղծել կանխամտածված անվճարունակության հատկանիշներ:

Մասնավորապես` 2007թ. մարտ եւ սեպտեմբեր ամիսներին Ա. Մկրտչյանը  «Հայպեռլիտ» ՍՊ ընկերության նկատմամբ  59 475 150 դրամի ունեցած պահանջի իրավունքն իր ծանոթ Վ.Վարդազարյանին զիջելու և գրավադնելու մասին կազմել է կեղծ  փաստաթղթեր: Հիշյալ փաստաթղթերի հիման վրա ՀՀ վարչական դատարանի` 2009թ. հունիսի 3-ի վճռով պետության հանդեպ ունեցած 17 852 300 դրամ հարկային պարտավորությունը չկատարելու նպատակով Երևան քաղաքի Կենտրոն և Նորք-Մարաշ համայնքների ընդհանուր իրավասության դատարանի` 2009թ. սեպտեմբերի 28-ի վճռով հօգուտ Վ. Վարդազարյանի բռնագանձվել է 2010թ. սեպտեմբերի 13-ի պայմանագրով գրավադրված ընկերության` 24 850 000 դրամի գույքը և 34 625 150 դրամի գումարը:

Բացի այդ` «Հայպեռլիտ» ՍՊ ընկերության տնօրենը 2008թ. 3-րդ, 4-րդ եռամսյակների և 2009թ. 4-րդ եռամսյակի ընթացքում տարբեր ընկերությունների հետ գործարքներ կատարելու վերաբերյալ ՀՀ ԿԱ պետական եկամուտների կոմիտեի` Սպանդարյանի 1 հարկային տեսչություն ԱԱՀ-ի հաշվարկներ  չներկայացնելու միջոցով խուսափել է պետբյուջե  7 077 000 դրամի խոշոր հարկեր վճարելուց:

Փաստի առթիվ հարուցվել է քրեական գործ` ՀՀ քրեական օրենսգրքի 193-րդ հոդվածով, 205-րդ հոդվածի 1-ին մասով եւ 38-193-րդ հոդվածով:

ԳԴ մամուլի ծառայություն