Հայաստանի հելսինկյան ասոցիացիայի Վանաձորի գրասենյակի ղեկավար Արթուր Սաքունցն այսօր լրագրողների հետ հանդիպման ժամանակ Չարենցավանի ոստիկանության բաժանմունքում մահացած Վահան Խալաֆյանի գործով մանրամասներ է ներկայացրել։

Հիշեցնենք, որ Չարենցավանի ոստիկանության բաժանմունք բերման էին ենթարկվել 6 հոգի, որոնցից մեկը՝ Վահան Խալաֆյանը, սպանվել է ոստիկանությունում, 3-ը կալանավորված են, իսկ 2-ը Հայաստանից բացակայում են։

-Ես մտահոգություն ունեմ, որ հատուկ քննչական ծառայության կողմից գործի քննությունը չի տարվում ամբողջական։ Ինձ մոտ տպավորություն է ստեղծվում, որ փորձ է արվում Չարենցավանի դեպքն ամբողջովին կենտրոնացնել միայն Վահան Խալաֆյանի սպանության փաստին։ Բայց փաստն այն է, որ բռնությունները կատարվել են ոչ միայն Վահան Խալաֆյանի նկատմամբ, այլև բոլոր բերման ենթարկվածների,-ասել է Ա. Սաքունցը։

Բանախոսն ասել է, թե ոստիկանության կողմից համապատասխան օպերատիվություն և ձգտում չկա՝ դեպքը բացահայտելու համար։

7or.am