ՌԴ Պետդումայի պատգամավոր, ԱՊՀ հարցերի, եվրասիական ինտեգրման և հայրենակիցների հետ կապերի հանձնաժողովի առաջին փոխնախագահ Կոնստանտին Զատուլինը ոչ ադեկվատ է անվանել Ադրբեջանի արձագանքը վերջերս Արցախ կատարած իր այցին։

«Իմ խոսքերն աղավաղվում են, թեև կա իմ ելույթի սղագրությունը։ Ես Ադրբեջանի հասցեին ոչ մի վատ բան չեմ ասել, այլ ընդամենը նշել եմ, որ մենք հանդես ենք գալիս ղարաբաղյան հակամարտության խաղաղ կարգավորման օգտին և դեմ ենք ցանկացած ռազմական սպառնալիքի։ Ինչ վերաբերում է իմ հասցեին հնչող սպառնալիքներին` ես սովոր եմ դրանց»,–նշեց պատգամավորը։

Նա կարծում է, որ ադրբեջանական կողմի անադեկվատության մասին արդեն բոլորը գիտեն։

«Բաքվում ոչ միայն իրենց իրավունք են վերապահում վիրավորել, վերագրել, բանսարկություններ անել, հրապարակավ հայտարարություններ անել ինչ–որ մեկի ինչ–որ տեղ ժամանելու վերաբերյալ։ Նրանք իրենց թույլ են տալիս մեր փոխարեն որոշել, թե որն է մեր շահը»,–ասել է Զատուլինը։

Ինչ վերաբերում է Ստեփանակերտում տեղի ունեցած համաժողովին, ապա նա հիշեցրել է, որ դրան մասնակցել են 150 հյուրեր 30 երկրերից։ Մեծ պատվիրակություն է եղել ԱՄՆ–ից, ներառյալ` սենատորներ։