Սեպտեմբերի 18-ին Եղեգնաձոր քաղաքում ՊՆ փոխգնդապետ է ծեծի ենթարկվել, որն այժմ գտնվում է վերակենդանացման բաժանմունքում: Վայոց Ձորի մարզպետ Տրդատ Սարգսյանի օգնականը ձերբակալվել է, Tert.am-ի տեղեկություններով՝ միջադեպին մասնակից է եղել նաև մարզպետը, ում հնարավոր մասնակցությունը միջադեպին ստուգվում է: Միջադեպի վերաբերյալ Tert.am-ի հետ զրույցում ՀՀ պաշտպանության նախարար Դավիթ Տոնոյանը նշեց, որ դեպքի առթիվ օպերատիվ հետախուզական աշխատանքներ են սկսվել:

«Քանի որ հիմա նախաքննություն է իրականացվում, որևէ բան չեմ կարող ասել: Մեզ ավելի շատ մտահոգել է, որ մեր փոխգնդապետի առողջական վիճակը հույսեր շատ չի տալիս: Նա մեր վերահսկողության տակ է գտնվում, ՊՆ-ի հոսպիտալում է»,-ասաց Տոնոյանը:

Նախարարի խոսքով՝ կասկած չկա, որ ՊՆ-ն Կառավարության անդամների հետ միասին հետևողական են լինելու գործին: Գործով զբաղվում է ռազմական ոստիկանությունը և քաղաքացիական ոստիկանությունը:

«Ամեն ինչ ազնիվ և արդար կլինի: Մեղավորներն իրենց պատիժը կստանան»,-նշեց նա:

Հիշեցնենք, որ սեպտեմբերի 18-ի գիշերը զինվորականների և մարզպետարանի աշխատակիցների մասնակցությամբ տեղի էր ունեցել միջադեպ, որի առթիվ հարուցվել էր քրեական գործ՝ ՀՀ քրեական օրենսգրքի 112-րդ հոդվածի 1-ին մասի հատկանիշներով: ՊՆ փոխգնդապետին ծեծելու գործով ձերբակալվել է Վայոց Ձորի մարզպետի օգնականը: Միջադեպին մասնակցել է նաև Վայոց Ձորի մարզպետ Տրդատ Սարգսյանը: