«Այսօր արդեն պաշտոնապես դիմեցինք ՀՀ վարչապետին։

Վաղը՝ ամսի 12-ին, ժամը 10:30, «Զինվոր համակարգող խորհուրդ»-ի շենքում (ք.Երևան Մուրացան 110) հրավիրում ենք մամուլի ասուլիսի՝ մասնակցությամբ Մարգարիտա Խաչատրյանի, Սաթիկ Խլղաթյանի, այրիների և որդեկորուստ մայրերի»,-ֆեյսբուքյան իր էջում հայտնել է Զինծառայողների ապահովագրության հիմնադրամի հոգաբարձուների խորհրդի անդամ Մեսրոպ Մանուկյանը։

Հիշեցնենք, որ ավելի վաղ նա գրել էր․ «Հաշվի առնելով կառավարության վերջերս կայացված որոշումը՝ կարծում եմ՝ արդարությունը հաստատելու ժամանակն է։

Ուստի հարկ եմ համարում տեղեկացնել. «Զինծառայողների ապահովագրության» հիմնադրամի սեպտեմբերին կայանալիք նիստի ժամանակ հանդես եմ գալու առաջարկությամբ.

⁃ զոհված և հաշմանդամ դարձած զինծառայողների ընտանիքներին աջակցության կառավարության սահմանած չափորոշիչներով` միանվագ 30 մլն դրամ փոխհատուցում տրվի բոլոր զոհվածների ընտանիքներին և 15 մլն դրամ հաշմանդամ դարձած զինծառայողների ընտանիքներին: Այն ոչ միայն բարոյական, այլև`պետական արժևորման տեսանկյունից խիստ կարևոր է:

⁃ Առաջարկելու եմ 10 մլն դրամը տրամադրի հիմնադրամը՝ համաձայն որդեգրած քաղաքակության, տարբերությունը ՀՀ պետբյուջեից։ Նույն տրամաբանությամբ նաև հաշմանդամ դարձած զինծառայողներին։ Հիշեցման կարգով ասեմ, որ դեռևս 09.08.2018թ. հիմնադրամի նիստի ժամանակ, երբ որոշվեց փոխհատուցում տալ նախորդ տարիները զոհված և հաշմանդամ դարձած զինծառայողների ընտանիքներին, առաջարկել էի, որ ոչ միայն ամսեկան, այլեւ միանվագ փոխհատուցում ևս լինի, ինչը մերժվել էր` բավարար գումար չլինելու պատճառաբանությամբ:

Հ.Գ. Ասվում է, որ ՀՀ պետբյուջեի եկամտային մասը այլևս կգերակատարվի` 25 %-ի չափով, որտեղից էլ կարելի է տրամադրել այդ փոխհատուցումը:

Հ.Գ. Հայրենիքի սահմանը պաշտպանող զինվորի կյանքն անգին է . . .»։

7or.am