Լրագրողների հետ հանդիպման ժամանակ քաղաքագետ Սերգեյ Շաքարյանցն անդրադառնալով հայ-թուրքական գործընթացի հետագա  զարգացմանը՝ ասել է, թե ապրիլի 24-ին լավագույն դեպքում կլինի նախորդ տարվա կրկնությունը, և ամերիկյան վարչակազմը հայամետ որևէ քայլ կդրսևորի, բայց որոշման կտրուկ փոփոխություն նախորդ տարվա համեմատ չի լինի:

Ըստ նրա՝ որևէ հիմք չկա մտածելու, որ ԱՄՆ նախագահ Բարաք Օբաման իր ուղերձում կհնչեցնի «Ցեղասպանություն» բառը:

Սերգեյ Շաքարյանցը նշել է, որ մեծ տերությունների համար Հայկական հարցը շարունակում է մնալ ուղղակի օժանդակ գործիք։

-Իրականում նրանք չեն ձգտում Հայկական հարցին շուտափույթ լուծում տալ,-նշել է նա:

Նա նաև անդրադարձել է  ՀՀ նախագահ Սերժ Սարգսյանի Մոսկվա կատարած այցին և նշել, որ պատահական չէ, որ այս տարվա ընթացքում նախագահ Սերժ Սարգսյանն արդեն երկրորդ անգամ է հանդիպում ռուս գործընկերոջը՝ Դմիտրի Մեդվեդևին:

-Այս ամենը վկայում է, որ չնայած վերջին իրադարձություններին, հայ-ռուսական հարաբերությունները շարունակում են մնալ տարածաշրջանում առաջնային,-ընդգծել է  քաղաքագետը:

Որպես վերջին իրադարձություն՝ Սերգեյ Շաքարյանցը կարևորել էր  ռուս-ամերիկյան հարաբերություններում նկատվող տեղաշարժը, հայ-ամերիկյան հարաբերություններում նկատվող մերձեցումը, Իրանի և արտաքին աշխարհի միջև հարաբերությունների սրացումը:

7or.am