Վրաստանի նախագահ Միխեիլ Սաակաշվիլիին

Վրաստանի Խորհրդարանի խոսնակ Դավիթ Բաքրաձեին

Վրաստանի Արտաքին գործերի նախարար Գրիգոլ Վաշաձեին

Սամցխե-Ջավախք-Ծալկա (Ջավախք) տարածաշրջանի շուրջ առկա և խորացող խնդիրների մասին բազմիցս է խոսվել: Շատ քաղաքական ուժեր և կազմակերպություններ, խորությամբ չըմբռնելով խնդրի էությունը, փորձում են Ջավախքի հիմնախնդիրը դասել Վրաստանի այլ նահանգներում առկա սովորական սոցիալտնտեսական խնդիրների շարքում: Այդ խեղաթյուրումը շրջանառության մեջ է դրվում հատկապես վրացական կողմի ջանքերով: Իրականությունը բոլորովին այլ է, և Ջավախքի սոցիալ-տնտեսական խնդիրների ամբողջովին լուծման պարագայում անգամ խնդիրների խորացումը երբեք կանգ չի առնելու: Դա բոլորին պարզ է և բնավ չունի ապացուցման կարիք: Հետևաբար' մենք,

• կարևորելով տարածաշրջանում կայունության և խաղաղ զարգացման հրամայականը,
• հաշվի առնելով Վրաստանի կայունության անհրաժեշտությունը նաև Հայաստանի Հանրապետության համար,
• ըմբռնելով հայկական Ջավախքի ռազմաստրատեգիական կարևորությունը Հայաստանի Հանրապետության համար,
• մատնանշելով թուրք-ադրբեջանական Մեծ Թուրանի շղթան հայկական Ջավախքով ընդհատելու կարևորությունը' և' Վրաստանի, և' ՀՀ-ի համար,
• հաստատելով հայկական Ջավախքով ՀՀ-ի ապաշրջափակման հարատևությունը,
• ճանաչելով ու պաշտպանելով իր պատմական հայրենիքում ապրող ջավախահայության սրբազան իրավունքը և այնտեղ հայկական ազգային մշակույթի զարգացումը,
• դատապարտելով Ջավախքի նկատմամբ ազգայնամոլության և ճնշումների ու դրանց փորձերի ցանկացած դրսևորում,
• գիտակցելով իր պատմական հայրենիքում' Ջավախքում ապրող հայության սրբազան պահանջների իրագործման կարևորությունը'

պահանջու'մ ենք.

• Վրաստանի իշխանություններից' վերջ տալ դեռ խորհրդային ժամանակներից սկիզբ առնող Ջավախքի մասնատման քաղաքականությանը: Ծալկայի նախկին հայաբնակ և հունաբնակ, այժմ' հայաբնակ, մասամբ նաև' վրացաբնակ շրջանը անջատել Քվեմո Քարթլի նահանգից և միացնել Սամցխե-Ջավախք նահանգին
• Վրաստանի իշխանություններից' նորաստեղծ Սամցխե-Ջավախք նահանգին շնորհել ինքնավարության կարգավիճակ մարդու իրավունքների Եվրոպական խարտիայի տառին և ոգուն համապատասխան
• Վրաստանի իշխանություններից' հարգել և հիմք ընդունել Ջավախքի միակ քաղաքական ուժ հանդիսացող Սամցխե-Ջավախքի և Քվեմո Քարթլիի հայկական հասարակական կազմակերպությունների խորհրդի' Ջավախքին ինքնավարություն տալու մասին պահանջը
• Հայաստանի Հանրապետության և Վրաստանի իշխանություններից' երկու երկրների միջպետական հարաբերությունների հիմքում ներառել Ջավախքի շահերը, ինչպես նաև այդ շահերը պաշտպանող Սամցխե-Ջավախքի և Քվեմո Քարթլիի հայկական հասարակական կազմակերպությունների խորհրդի պահանջները:

Միացել են քաղաքական կազմակերպություններ'

Ազգային նոր պահպանողական շարժում

Հայ Յեղափոխական Դաշնակցություն կուսակցություն

Սոցիալ-Դեմոկրատ Հնչակյան կուսակցություն

Ժողովրդական կուսակցություն

 Քառասունութ հասարակական կազմակերպություններ