«Գոլոս Արմենիի» թերթն անդրադարձել է BBC-ի աղմկահարույց հրապարակմանը՝ «Ո՞վ է կրակել ցուցարարներին Երևանում 2008 թվականին․ քննությունը մատնանշում է Ղարաբաղի ջոկատին» վերնագրով։ Ռուսական թերթը նշում է, որ հոդվածի գլխավոր նպատակը հայ հասարակությունը պառակտելն է կեղծ վկայություններ տարածելու միջոցով։

Ռուսական թերթ առաջ է քաշում հետևյալ հարցը․ «Ինչպե՞ս է բրիտանական ԶԼՄ-ին հաջողվել էքսկլյուզիվ կերպով տեղեկություններ ստանալ նախաքննության նյութերից, որոնք գաղտնի են։ Ովքե՞ր են այդ նյութերը տրամադրել արտասահմանյան պարբերականին, և ո՞վ է պատասխանատու դրա համար»։

«Ամենահետաքրքրականն այն է, որ լրագրողը պարզաբանման համար դիմել է ՀՔԾ, որտեղ կարծես թե ընդհանրապես չեն զարմացել այն փաստից, որ լրագրողին հայտնի են քննության գաղտնիքները։ BBC-ն փորձում է օբյեկտիվության պատրանք ստեղծել՝ իր հիմնական առաջադրանքները կատարելով։ Ինչո՞ւ են լուրջ եզրահանգումներ արվում միայն քննիչների հավաստիացումների հիման վրա, և վերջապես, որտեղի՞ց ունի BBC-ն հարցաքննության կրկնօրինակը։

Հոդվածն այլ կերպ չես անվանի, քան սադրիչ և ծայրահեղ կեղտոտ կարերով կարված, որովհետև իրականում ոչ մի բան այն ամենից, ինչ հաղորդվում է ընթերցողներին, քննության նյութերում չկա, ինչի մասին հայտնել են Ռոբերտ Քոչարանի փաստաբանները մամուլի ասուլիսի ընթացքում։

Հոդվածը նպատակ ունի վարկաբեկել Արցախի ռազմաքաղաքական ղեկավարությանը և ՊԲ գեներալիտետին։ Կարապետյանի և «ղարաբաղյան ուժայինների» դեմ մեղադրանքները զազրելի և ստոր նպատակ ունեն՝ հայ ժողովրդի երկու մասերին պառակտել Արցախի ղեկավարությանը մարտի մեկի ցուցարարների մահվան մեջ մեղադրելու ճանապարհով, և պահը բավականին հարմար է ընտրված՝ հաշվի առնելով Արցախում նախընտրական իրավիճակը։

Ո՞ւմ է ձեռնտու նմանատիպ մանիպուլյացիան, որն ակնհայտ սպառնալիքներ ունի ոչ միայն Արցախի, այլև հայկական պետականության համար, ավելորդ է ասել։ Պատասխանը մատնանշում է ոչ միայն թուրք-ադրբեջանական տանդեմը, այլև արտաքին խաղացողներին, ինչպես նաև հենց Հայաստանում որոշ ուժեր, որոնք առաջին նախագահի ժամանկներից ջուր են լցնում թշնամու ջրաղացին և կտրուկ ակտիվացել են իշխանափոխությունից հետո։

Հույս չպետք է ունենալ, թե ազգային, այդ թվում՝ տեղեկատվական անվտանգության համար պատասխանատու կառույցները պատասխան կտան։ Այդ պատասխանը պետք է տան հայ հանրությունը և նրա առողջ ուժերը, որոնց համար կարծես թե դժվար և պատասխանատու փորձությունների շրջան է սկսվում»,-գրում է թերթը։

Աղբյուրը՝ yerevan.today