«Մեր դատական համակարգի բոլոր խնդիրները բխում են անկատար սահմանադրությունից»։ Լրագրողների հետ հանդիպմանը հուլիսի 26-ին ասել է «Ազգային ինքնորոշում միավորում» կուսակցության նախագահ Պարույր Հայրիկյանը։

Նա նշեց, որ ՀՀ բոլոր խնդիրների հիմքում ընկած է օրենքի ներսում եղած բացթողումները. «Եթե որևէ մեկը ձեզնից պաշտոնապես մի տեղ գրեր, որ Սերժ Սարգսյանի ընդունած ընտրական օրենսգրքով արդար պառլամենտ ընտրվել չի կարող և դրանից երկու ամիս այդ օրենսգրքով գնար արդար ընտրությունների, կասեիք դա հոգեկան հիվանդ է, բայց չեք ուզում քննադատական խոսք ասել այդ խոսքերն ասած Նիկոլ Փաշինյանին: Հիմա նա ասում է՝ մենք ունենք լեգիտիմ իշխանություն. այն ժամանա՞կ էիր հոգեկան հիվանդ, փոքրիկ բալիկ, թե՞ հիմա»,-ասաց Հայրիկյանը։

«Դատարանի և որևէ հարցի վերաբերյալ սկզբունքային, արմատական լուծում հնարավոր չէ որևէ մեկի քմահաճույքով, եթե այդ քմահաճույքի տերը «Քաջ Նազարի» բախտով կամ ժողովրդի խանդավառությամբ դարձել է իշխանության ղեկավար»,-լրագրողների հետ զրույցում ասաց ԱԻՄ նախագահ Պարույր Հայրիկյանը:

ԱԻՄ նախագահն առաջարկում է Փաշինյանին չմիջամտել դատական գործերին. «Այդ երբ քնեց ու զարթնեց այդ փոքրիկը, որ ճակատին էլ դուխով է գրում, հարցերը դուխով չեն լուծում, այլ բանականությամբ, և ոչ թե պրիմիտիվ դուխով: Դու ասում էիր դատական իշխանության վրա ճնշում չեմ գործադրելու: Դե ուրեմն հանգիստ նստիր տեղդ, չխառնվես դատարանի գործերին: Ուզում ես խառնվել՝ միայն սահմանադրական փոփոխությունններով և ժողովրդի միջոցով»:

Մանրամասն՝ yerevan.today-ի տեսանյութում։