Հայաստանում չկա սահմանադրական ճգնաժամ, նման մասնագիտական կարծիքների արդյունքում չի էլ կարող լինել: Անդրադառնալով Վահե Գրիգորյանի հայտնի նամակին՝ լրագրողների հետ զրույցում նման տեսակետ հայտնեց սահմանադրագետ Արամ Վարդևանյանը:

Հիշեցնենք, որ Սահմանադրական դատարանի նորընտիր դատավոր Վահե Գրիգորյանը նամակ էր հղել Հայաստանի նախագահին, Ազգային ժողովին, Կառավարությանը, Դատավորների ընդհանուր ժողովին, Սահմանադրական դատարանի անդամներին ու դատավորին: Նամակում Գրիգորյանը խոսում էր Սահմանադրական դատարանում ճգնաժամի ու դրանից դուրս գալու ելքերի մասին:

«Ես ուսումնասիրել եմ պարոն Գրիգորյանի նամակը: Երբ մենք խոսում ենք սահմանադրական ճգնաժամի մասին, չեք պատկերացնում՝ ապացուցման ինչ ստանդարտ է դա ենթադրում, այսինքն՝ ինչեր պետք է ներկայացնի անձը: Իսկ նամակում ներկայացվում է անդամ-դատավոր բառախաղը և ներկայացվում է Սահմանադրական դատարանի անդամի, այնուհետև դատավորի երդման տեքստերը: Եթե ՀՀ-ում ՍԴ դատավորի երդման տեքստը լիներ սահմանադրական պահանջ, նորմ, ես կփորձեի դա ընկալել: Բայց դա օրենքով սահմանված որոշակի գործառույթ է և ՍԴ-ի երդման տեքստով չէ, որ իրենց գործառույթն է գնահատվում կամ իրացվում, այլ իրենց լիազորությունների և պարտականությունների տիրույթում է գնահատվում, իսկ դրանք նույնական են 1995-2015 թթ.»,-ասաց նա:

Վարդևանյանի խոսքով՝ Սահմանադրության 16-րդ գլխի 213-րդ հոդվածում հստակ ներկայացվում է, որ ՍԴ անդամները շարունակում են պաշտոնավարել, այսինքն՝ տրանսֆորմացվում են դատավորի. «2018 թ. ապրիլի 9-ից հետո մենք չունենք ՍԴ անդամներ, մենք ունենք ՍԴ դատավորներ: Այստեղ բարդ բան չկա, ամեն ինչ չափազանց պարզ էր»:

Աղբյուրը՝ tert.am