ՀՀ երկրորդ նախագահ Ռոբերտ Քոչարյանի փաստաբանները մամուլի ասուլիս են հրավիրել։

Նրանք անդրադառնում են Վերաքննիչ քրեական դատարանի կայացրած դատական ակտերին։

«Հայաստանի 2-րդ նախագահ Ռոբերտ Քոչարյանի խափանման միջոց կալանքը ընտրելու որոշումից հետո էական փաստական հանգամանքներ են փոխվել, և հայտնի է, որ Քոչարյանը, 20 օր անազատության մեջ մնալով, չի խոչընդոտել քննությանը»,– հայտարարել է Քոչարյանի պաշտպանական խմբի անդամ Արամ Օրբելյանը։

Նրա խոսքով՝ պետք է գնահատել մի քանի հանգամանք, մասնավորապես, այն, որ Սահմանադրական դատարանը վարույթ է ընդունել Ռոբերտ Քոչարյանի դիմումը 300.1 հոդվածի սահմանադրականության հարցը լուծելու վերաբերյալ, ինչպես նաև դատախազության կողմից դատավոր Դավիթ Գրիգորյանին ինքնաբացարկ հայտնելու միջնորդությունը։

«Դատական այս փուլը կանոնակարգված չէ, և մենք բազմիցս այդ հարցը բարձրացրել ենք՝ այս ամենը առաջացնում է պարոն Քոչարյանի արդար դատաքննության իրավունքի խախտում, որովհետև չկանոնակարգված դատական գործընթացներում անձը չի կարող ունենալ արդար դատաքննություն», - ասաց Օրբելյանը։

Նրա խոսքով՝ չգիտես՝ ինչու բոլորը կարծում են, թե դատական գործի քննության ժամանակ Ռոբերտ Քոչարյանը պետք է լինի անազատության մեջ։ Մինչդեռ պաշտպանական խումբը այդ կարծիքին չէ. «Մենք գտնում ենք, որ հակառակը, պարոն Քոչարյանը պետք է լինի ազատության մեջ և գործը պետք է մտնի դատական քննություն, քանի դեռ ռեալ հանգամանքներով չի հաստատվել, որ Քոչարյանը խոչընդոտում է, միջամտում է քննությանը»։

Օրբելյանը ընդգծեց, որ նախաքննության ընթացքում եղել է ժամանակահատված, որ Ռոբերտ Քոչարյանը գտնվել է ազատության մեջ, սակայն որևէ փաստով չի հաստատվել, որ նա խոչընդոտում է քննությանը։ Դատախազությունը, ըստ նրա, ընդամենը տեսական կասկածներ է հայտնում այն մասին, որ Ռոբերտ Քոչարյանը կարող է միջամտել քննությանը, ճնշում գործադրել գործով անցնող վկաների վրա։

«Միշտ կարող ենք ասել, որ տեսական հնարավորություն կա։ Դատախազության տրամաբանությամբ՝ ցանկացած բարձրաստիճան նախկին պաշտոնյայի նկատմամբ ցանկացած քրեական գործի դեպքում էլ կալանավորելու հարց չպետք է քննարկել ու նրան անմիջապես կալանավորել, որովհետև նա ազդեցիկ է ու կարող է ազդել գործի մասնակիցների վրա։ Հիմա մենք ասում ենք՝ կան հակառակը հաստատող փաստեր», - aysor.am–ի փոխանցմամբ՝ նկատեց Արամ Օրբելյանը։

Մյուս կողմից, ըստ փաստաբանի, պետությունն ունի պարտավորություն իր վկաներին պաշտպանել, եթե ունի մտավախություններ, որ մեղադրյալը տեսականորեն կարող է ազդել նրանց վրա։

Փաստաբան Հովհաննես Խուդոյանն ընդգծել է, որ Վերաքննիչ դատարանի որոշումներն ընդունվել են նորմերի կոպիտ խախտումներով։ Որոշումներն արդեն հրապարակվել են, բայց հիմա էլ խախտումները չեն վերացվել։ Խախտումներից մեկն այն է, որ Վերաքննիչ դատարանը փաստել է, որ դատավարությունը պետք է սկսվի առաջին ատյանի դատարանում ընդհատված կետից։ Ընդ որում՝ Վերաքննիչ դատարանը նյութերը չի հանձնում առաջին ատյանի դատարան։ Դրանով իսկ ձգձգում է գործընթացը։ Պատճառներն անհասկանալի են, news.am–ի փոխանցմամբ՝ ասել է փաստաբանը։ Նա հիշեցրել է, որ ՍԴ հանձնելու մասին որոշումն ընդունվել է դատավարության ընդհատումից մեկ օր առաջ։ Ստացվում է, որ դատարանը, երկրորդ անգամ գործը վարույթ ընդունելով, մեկ օրում պետք է լուծի դատավարության ճակատագիրը։ Ընդ որում՝ նորից ժամանակ չի տրվում ծանոթանալու նյութերին։ Վերաքննիչ դատարանը իր գործողությունները բացատրում է նրանով, որ սպասում է Վճռաբեկ դատարան հանձնելու ժամկետի ավարտին։ Ընդգծելով դատավարության արհեստական ձգձգման անթույլատրելիությունը՝ փաստաբանները միաժամանակ ընդգծել են, որ մեղադրական կողմը չի կարող վնաս կրել դատարանի գործողություններում խճճվածության պատճառով։

Ինչ վերաբերում է նրան, թե նյութերը ոչ մի կերպ չեն հայտնվում առաջին ատյանի դատարանում, Վերաքննիչ դատարանը դրանք չի հանձնում, որպեսզի Վճռաբեկ դիմելու դեպքում անմիջապես հանձնի այնտեղ, Խուդոյանը հիշեցրել է, որ ոչինչ չի խանգարում հանձնելու նյութերի պատճենները։ Մենք ինքներս պատրաստ ենք ներկայացնել սքանավորված տարբերակը, ավելացրել է փաստաբանը։