Լեզվի պետական տեսչության պետի պաշտոնակատար, բանասիրական գիտությունների դոկտոր, պրոֆեսոր Սերգո Երիցյանը լրագրողների հետ հանդիպման ժամանակ ասել է, թե լեզվի պետական տեսչությունը  կորցրել է իր գործառույթների մի մասը, և դրա հետևանքով լեզվի պետական տեսչությանը վերապահված է միայն հսկողական գործառույթ, և այդտեղ էլ իրենք օրենսդրական  բազմաթիվ խնդիրների են բախվում։

-Լեզվական վերահսկողական գործառույթները շատ հաճախ չեն կատարվում, որովհետև լուրջ հակասություններ կան լեզվի մասին օրենքի և հետագայում ստեղծված այն օրենքների միջև, որոնք գոյություն ունեն (օրինակ՝ գովազդի, ապրանքանիշերի մասին օրենքը),-նշել է նա։

Ըստ Սերգո Երիցյանի՝ նույն գովազդի մասին օրենքի առաջին մասում նշված է, որ Հայաստանում գովազդային լեզուն հայերենն է, իսկ 5-րդ կետի համաձայն ապրանքանիշերի և մակնիշների առումով բացառություններ են արվում, որոնք կազմում են շուրջ 80-85%-ը և հակասում 1-ին կետին։

-Օտարամոլությունն այնքան է խեղդել, որ նույնիսկ տաքսիներն են օտար անվանումներով պտտվում։ Մենք փորձում ենք ինչքան հնարավոր է՝ հեռանալ մեր մայրենի լեզվից և տեղ տալ օտարամոլությանը։ Սա ոչ թե լեզվի խաթարում է, այլ օտարամոլություն, որն իր հետ բերում է  այնպիսի հետևանքներ, որոնք հեշտ չի լինելու շտկել,-նշել է նա։

7or.am