Ռուսաստանի նախագահն ու Հայաստանի վարչապետը երեկվա հանդիպման օրակարգում ղարաբաղյան հակամարտությունը չի եղել, այսօր հայտնել է Կրեմլի խոսնակ Դմիտրի Պեսկովը:

«Երեկ տեղի է ունեցել շատ մանրամասն, հանգամանալից խոսակցություն երկկողմ հարաբերությունների և առևտրատնտեսական տարբեր հարցերի շուրջ, ղարաբաղյան խնդիրը չի քննարկվել»,-ասել է Պեսկովը:

Հայաստանի վարչապետի խոսնակ Վլադիմիր Կարապետյանը, ըստ «Արմենպրես»-ի, հանդիպումից հետո ասել էր՝ ղարաբաղյան հակամարտությանը անդրադարձ եղել է, սակայն հարցերը վերաբերել են հիմնականում տնտեսական օրակարգին։ «Լեռնային Ղարաբաղի հակամարտության կարգավորման հարցի վերաբերյալ մանրամասն քննարկում չի եղել, պարզապես նշվել է, որ կա ընդհանուր ըմբռնում այս խնդրի վերաբերյալ»,-ասել էր Կարապետյանը:

Վարչապետ Նիկոլ Փաշինյանը Ռուսաստան է մեկնել երեկ, այսօր նախատեսվում է նրա ելույթը Սանկտ Պետերբուրգի միջազգային տնտեսական համաժողովում:

Աղբյուրը՝ Ազատություն