Ըստ նախնական պայմանավորվածության՝ Ամուլսարի վերաբերյալ «Էլլարդ» ընկերության կողմից հիդրոերկրաբանական հետազոտության նախնական արդյունքները ՀՀ քննչական կոմիտեին կփոխանցվեն մայիսի վերջերին։ Այս մասին այսօր կառավարության նիստից հետո լրագրողներին ասել է փոխվարչապետ Տիգրան Ավինյանը։

«Մայիսի վերջին արդեն նախնական պատկերը հստակ կլինի», - ասաց նա՝ նշելով, որ արդյունքներն ստանալուց հետո միայն կառավարությունը դրան համապատասխան իր դիրքորոշումը կհայտնի:

Ինչ վերաբերում է հարցին, թե ներդրումային ծրագիրն ինչ հանգուցալուծում կստանա՝ փոխվարչապետը նշեց, որ բոլոր հնարավոր հարթակներից հնչեցրել են, որ որևէ տնտեսվարողի նկատմամբ խտրական վերաբերմունք չկա ու չի կարող լինել:

«Հետևապես, եթե բնապահպանական որևէ խնդիրներ չի առաջացնում կամ այն խնդիրները, որոնք ընկերության ու մեր կողմից վերահսկելի են, ընկերությունը շարունակելու է իր գործունեությունը», - ասաց նա:

Հարցին, թե հետագա ներդրողների վրա ինչ-որ անդրադարձ կարո՞ղ է ունենալ այս ամենը, փոխվարչապետն ասաց, որ կառավարությունն, առաջին հերթին, առաջնորդվում է ՀՀ ժողովրդի շահերով:

«Բոլոր այն ռիսկերը, որ կան, մեզ համար բացահայտված չեն, ու հուսով ենք, որ հետազոտությունը բոլոր ռիսկերի պատասխանները տալու է», - ասաց Տիգրան Ավինյանը:

Աղբյուրը՝ Փաստինֆո