Ապրիլի 30-ին Տավուշում հակառակորդի կրակոցից վիրավորում ստացած Արգիշտի Սեփխանյանը տեղափոխվել է հիվանդասենյակ։ Այս մասին «Փաստինֆո»-ն տեղեկացավ ՀՀ ՊՆ մամուլի խոսնակ Արծրուն Հովհաննիսյանից. «Արդեն պալատում է, այսօր նույնիսկ կնքվելու է»,-ասաց նա։

«Փաստինֆո»-ն միաժամանակ հետաքրքրվեց մայիսի 4-ին Արցախում հակառակորդի կրակոցից վիրավորում ստացած Ագանիկ Զորոգլյանի առողջական վիճակից։ Արծրուն Հովհաննիսյանը հայտնեց, որ նա դեռ վերակենդանացման բաժանմունքում է, սակայն գիտակցութունն արդեն տեղն է, սկսել է խոսել։

Հիշեցնենք, որ 1987թ. ծնված պայմանագրային զինծառայող Արգիշտի Սամվելի Սեփխանյանն ապրիլի 30-ին Տավուշում հակառակորդի կրակից վիրավորում էր ստացել գլխի շրջանում: Նրան ուղղաթիռով տեղափոխել էին Երևան, այնուհետև՝ վիրահատել: Վիրահատությունը բարեհաջող ընթացք էր ունեցել: Իսկ 1998թ. ծնված Ագանիկ Զորոգլյանը հակառակորդի կրակոցից հրազենային վիրավորում էր ստացել մայիսի 4-ին՝ ժամը 16:05-ի սահմանում, Պաշտպանության բանակի հարավարևելյան ուղղությամբ տեղակայված զորամասերից մեկի պահպանության տեղամասում։