Լոնդոնի «Արսենալի» և Հայաստանի ազգային հավաքականի կիսապաշտպան Հենրիխ Մխիթարյանը կարող է բաց թողնել Եվրոպա լիգայի այս մրցաշրջանի եզրափակիչը:

«Զինագործները» վճռորոշ խաղում ուժերն են չափելու «Չելսիի» հետ, իսկ հանդիպումը կայանալու է Բաքվի Օլիմպիական մարզադաշտում մայիսի 29-ին:

«Daily Mail»-ը գրում է, որ քաղաքական պատճառներով Մխիթարյանը կարող է չմեկնել Բաքու:

ՈւԵՖԱ-ն պատրաստ է օգնել հայ կիսապաշտպանին Ադրբեջանի վիզա ստանալու հարցում: Սակայն «Արսենալում» կասկածներ ունեն: Ակումբում կարծում են, որ Մխիթարյանն անվտանգության հետ կապված լուրջ խնդիրների կարող է հանդիպել Բաքվում:

Աղբյուրը նաև նշում է, որ հայ ֆուտբոլիստը դժվար թե լինի իր թիմի մեկնարկային կազմում, և սա նույնպես կարող է պատճառ հանդիսանալ, որ Մխիթարյանը մնա Լոնդոնում:

Կայքը նաև հիշեցրել է, որ նախկինում եղել են դեպքեր, երբ հայ կիսապաշտպանը հրաժարվել է մեկնել Բաքու՝ եվրագավաթային հանդիպումների:

Լոնդոնի «Արսենալը» Եվրոպա լիգայի այս տարվա խաղարկությունում հասավ մինչև եզրափակիչ:

Երեկ՝ կիսաեզրափակիչ երկրորդ խաղում, լոնդոնցիները հյուրընկալվելիս 4:2 հաշվով հաղթեցին «Վալենսիային»: Հանդիպմանը մասնակցեց նաև Հայաստանի հավաքականի ավագ Հենրիխ Մխիթարյանը:

Մեր ընտրանու կիսապաշտպանը դարձավ գոլային փոխանցման հեղինակ, ինչից հետո Օբամեյանգը ձևակերպեց վերջնական հաշիվը:

Հանդիպումից հետո Facebook-ի իր պաշտոնական էջում հայ ֆուտբոլիստը լուսանկար է հրապարակել՝ գրելով.

«Մեկ թիմ, մեկ նպատակ: Եկե հաղթենք այս Եվրոպա լիգայի եզրափակիչը»:

Աղբյուրը՝ armsport.am