SHAMSHYAN.com-ի տեղեկություններով՝ երեկ՝ մարտի 6-ին, ոստիկանության Երևան քաղաքի վարչության ՊՊԾ գնդի 4-րդ վաշտի ծառայողները Երևանում կանխել են տղամարդու ինքնասպանության փորձը: Ինչպես հայտնում է ֆոտոլրագրող Գագիկ Շամշյանը, ժամը 12:30-ի սահմաններում ոստիկանները «Հաղթանակ» կամրջի մոտ ծառայություն կատարելիս են եղել, երբ նրանց են մոտեցել 2 քաղաքացի ու հայտնել, որ մի տղամարդ անցել է կամրջի արգելապատնեշն ու վտանգավոր եզրագիծը և սպառնում է կամրջից ցած նետվել:

ՊՊԾ գնդի 4-րդ վաշտի ծառայողները կարողացել են հոգեբանական զրույցի արդյունքում փրկել տղամարդու կյանքը, ով ոստիկանների օգնությամբ անցել է անվտանգ վայր, ինչից հետո ոստիկանները նրան տեղափոխել են ոստիկանության կենտրոնական բաժին, որտեղ փաստի առթիվ հետաքննչական բաժանմունքում նյութեր են նախապատրաստվում: Գ. Շամշյանի տեղեկություններով՝ այդ տղամարդը Երևանի բնակիչ, 51-ամյա Ռ. Հ.-ն է, ով Երևանում գործող ընկերություններից մեկում աշխատում է որպես դեղագետ: