Լրագրողների հետ հանդիպման ժամանակ ՀՀ բուհերի ուսխորհուրդների նախագահները հայտարարել են, թե համամիտ չեն ՀՀ սպորտի և երիտասարդության հարցերի փոխնախարար Արսեն Քարամյանի արտահայտած այն մտքին, թե կրթությունը պետք է լինի թանկ և որակով։

-Ես չեմ համրում, որ ուսման վարձի բարձրացումը կարող է նպաստել ուսման որակի բարձրացմանը։ Իսկ ո՞վ է ասում, որ նրանք, ովքեր հնարավորություն ունեն մեծ վարձ տալու, հաստատ այն ուսանողներն են, ովքեր հետաքրքրված են ուսումնական գործընթացով և ուզում են սովորել։ Իմ կարծիքով՝ այն գները, որ այսօր կան, բավական են և որոշ չափով էլ նույնիսկ ավելի են։ Իմ կարծիքով՝ կրթության որակի բարձրացման համար կարևոր է շեմը բարձրացնել։ Օրինակ, մեր համլսարանում երեք քննությունից 8 միավոր ստացած ուսանող կա, որը նույնիսկ անգլերեն հաղորդակցվել չի կարողանում, իսկ մեր ողջ դասընթացը օտար լեզվով է կատարվում։ Ես կարծում եմ, որ շեմը պետք է բարձրացնել, որպեսզի ընդունվեն այն ուսանողները, ովքեր հետքրքրված են դրանով,-ասել է Վ. Բրյուսովի անվան պետական լեզվաբանական համալսարանի ուսխորհրդի նախագահ  Հասմիկ Ափյանը։

Երևանի թատրոնի և կինոյի պետական ինստիտուտի ուսխորհրդի նախագահ Էմին Թորոսյանն էլ է դեմ արտահայտվել Արսեն Քարամյանի արտահայտած մտքին։

-Վարձավճարները բարձրացնելով՝ որակյալ կրթություն չենք կարող ապահովել,-ընդգծել է նա։

ԵՊՀ ուսխորհրդի նախագահ Ցոլակ Ակոբյանն էլ մասամբ է համաձայնել փոխնախարարի հետ։

-ԵՊՀ-ում այսօր սովորում է 18 000 ուսանող, սակայն համալսարանը կարող է ապահովել 8-9 հազար ուսանողի, և դա խոչընդոտում է նորմալ կրթություն ստանալուն։ Ֆակուլտետներ կան, օրինակ մերը՝ միջազգային հարաբերությունների ֆակուլտետը, որ լսարան չունենալու պատճառով դասեր չի անում,-ասել է նա։

Ցոլակ Ակոպյանը խորհուրդ է տվել որոշ «էլիտար» ֆակուլտետների ուսման վարձերը բարձրացնել, բայց դրա փոխարեն իջեցնել այն ֆակուլտետների վարձերը, որոնք ՀՀ-ին անհարաժեշտ մասնագիտություններ են տալիս՝ օրինակ բնապահպանական ֆակուլտետները։

7or.am