Վրաստանի ՆԳՆ-ն հայաստանցի գործընկերների ու Facebook սոցցանցի ադմինիստրացիայի շնորհիվ պարզել է «Վրացական երազանք–Ժողովրդավարական Վրաստան» իշխող կուսակցության պատգամավոր Էկա Բեսելիայի անձնական կյանքի մասին տեսանյութը տարածողի ինքնությունը։ Այս մասին հայտնում է Sputnik Գրուզիան։

Բեսելիայի խոսքով՝ սկանդալային տեսանյութը սկսել են տարածել համացանցում հունվարի 28-ին։ Տեսանյութը պահելու ու սոցցանցերի միջոցով տարածելու մեղադրանքով 17 մարդ է ձերբակալվել։ Նրանցից երեքը, այդ թվում տեսանյութը Youtube-ում հրապարակողը, պետք է սպասեն դատարանի վճռին։

Մինչև վերջերս փնտրում էին գլխավոր տարածողին։

ՆԳՆ-ն պարզել է, որ հունվարին սկանդալային տեսանյութը Facebook-ում բազմաթիվ անգամ հրապարակել է buba lomtatidze անունով օգտատերը։ Նա Վրաստանի քաղաքացի Դ․Ի-ն է, որը սպանության համար գտնվում է Հայաստանի կալանավայրերից մեկում։ Այս մասին նշվում է ՆԳՆ հաղորդագրության մեջ։

Դ․Ի-ն 2016 թվականի նոյեմբերին կնոջ հետ լքել է Վրաստանը։

«Վրացական ու հայկական իրավապահ մարմինների համագործակցության արդյունքում Վրաստանի քաղաքացու խցի խուզարկման ընթացքում հայտնաբերվել է նրան պատկանող Samsung բջջային հեռախոս։ Վրաստանի ՆԳՆ-ն շարունակում է համագործակցել հայ գործընկերների հետ, համապատասխան միջոցառումներ են անցկացվում լրացուցիչ ապացույցներ ստանալու համար»,-նշվում է հաղորդագրության մեջ։

Բեսելիայի խոսքով՝ այդ տեսանյութը եղել է երեք տարվա վաղեմություն ունեցող աղմկահարույց քրեական գործի նյութերում։ Այն ժամանակ տարբեր քաղաքական գործիչների ինտիմ տեսանյութերը հրապարակվել էին համացանցում ու հասանելի էին բոլորին։ Դրանք դիտել են հարյուրավոր, գուցե հազարավոր անգամ։ Բեսելիան հայտարարել է, որ տեսանյութերն արվել են Միխեիլ Սահակաշվիլու նախագահության օրոք, այսինքն 2012 թվականի իշխանափոխությունից առաջ` որպես կոմպրոմատ այն ժամանակվա ընդդիմադիրների դեմ։

«Մենք ևս մեկ անգամ կոչ ենք անում հասարակությանը չներգրավվել հանցավոր գործունեության կամ դրա խրախուսելու մեջ և դադարել նման տեսանյութերի տարածումը։ Հակառակ դեպքում իրավապահ մարմինների ներկայացուցիչները համապատասխան միջոցներ կկիրառեն»,-նշվում է ՆԳՆ հաղորդագրության մեջ։

Աղբյուրը՝ armeniasputnik.am