«Freedom House» իրավապաշտպան կազմակերպությունը հրապարակել է «Freedom in the World» ամենամյա զեկույցը, որում Թուրքիան արդեն 2-րդ անգամ տեղ է գտել «անազատ» երկրների շարքում։

Կազմակերպությունն արձանագրել է, որ վերջին 13 տարում ողջ աշխարհում ազատությունների վիճակը հետզհետե վատթարանում է։ 2018թ․ Թուրքիան կորցրել էր 32 միավոր՝ առաջին անգամ տեղ գտնելով «անազատ» երկրների ցանկում։ 2019թ․ զեկույցում այս երկիրը դարձյալ 31 միավոր է կորցրել։

Որպես ողջ աշխարհում ազատությունների վիճակı հետընթացի օրինակ՝ զեկույցի նախաբանում հիշատակվել է Թուրքիայում հետզհետե շատացող «նախագահին վիրավորելու» մեղադրանքով դատական գործերի մասին։

«Այս համաշխարհային թրենդի ամենաակնհայտ օրինակներից մեկն այն է, որ միայն 2017թ․ Թուրքիայում «երկրի նախագահին վիրավորելու» մեղադրանքով 20․000-ից ավելի հետաքննություն և 6․000-ից ավելի դատական գործ է ընթացել։

24 երկրներ, որոնց թվում տեղ են գտել Ռուսաստանի, Չինաստանի, Թուրքիայի, Իրանի և Սաուդյան Արաբիայի նման ծանրակշիռ երկրներ, ընդդիմադիրներին հետապնդել են նաև երկրի սահմաններից դուրս, պահանջել նրանց արտահանձնումը, հետապնդել նրանց, գողացել և անգամ սպանության փորձ կատարել», - ասված է զեկույցում։

Որպես ավտորիտար ռեժիմների կողմից կիրառվող ագրեսիվ միջոցների օրինակ՝ անդրադարձ է կատարվել Թուրքիայում անմիջապես դեսպանատան շենքում սաուդցի լրագրող Ջեմալ Խաշոկջիի (Քաշըքչը) սպանությանը։

«Թուրքիան, որ ցանկանում էր Խաշոկջիի սպանության լուրը տեսնել բոլոր թերթերի առաջին էջերում, ինքն էլ 21 երկրի 104 քաղաքացու է փախցրել՝ պետության թշնամի լինելու մեղադրանքով։ Թուրքիայում երկու տարի տևած «արտակարգ դրության» ռեժիմի ընթացքում առաջատար ընդդիմադիր կուսակցությունների առաջնորդները բանտարկվեցին, հավաքների և խոսքի ազատությունների դեմ չափից դուրս մեծ ճնշումներ գործադրվեցին։

2018թ․ հունիսին կայացած ընտրություններից հետո թեև «արտակարգ դրության» ռեժիմը դադարեցվեց, բայց ավտորիտարների կողմից պետական կառույցների լուծարումն ու լրագրողների, մտավորականների, ՀԿ անդամների կալանավորումները շարունակվում են», - ասված է զեկույցում։

Աղբյուրը՝ «Էրմենիհաբեր»