Ազգային ժողովում Վերահսկիչ պալատի նախագահ Իշխան Զաքարյանը հայտարարել է, որ դատի է տվել ԺԱԿ նախագահ, ՀՀԿ խմբակցության անդամ Սպարտակ Մելիքյանին: ԱԺ նիստի ընդմիջման ընթացքում Սպարտակ Մելիքյանը պատասխանել է լրագրողների հարցերին:

-Ապացույցներ ունե՞ք ձեր ասածների վերաբերյալ:

-Երևի ես անլուրջ մարդու տպավորություն չեմ թողնում, որ առանց ապացույցների խոսեմ և այսպիսի բարձր ամբիոնից հայտարարություն անեմ:

-Այսինքն, դատարանում կարո՞ղ եք ապացուցել ձեր ասածը:

-Կգա դատարան, դատարանում ամեն ինչ կբարզաբանենք:

-Ինչո՞ւմ եք մեղադրում Վերահսկիչ պալատին:

-Նախ, ուզում եմ բարձրաձայնել բոլորի համար, հատկապես՝ որ դա գաղտնիք չէ: Տարբեր լրատվամիջոցներով մի քանի անգամ լուսաբանվել է «Անանիա Շիրակացի» համալսարանի գործունեությունը, և որևէ մեկի համար գաղտնիք չէ, որ ես համարվում եմ այդ համալսարանի սեփականատերը։ Եվ այն փաստը, որ Սահմանադրությունն ինձ թույլ է տալիս հանդիսանալ այդ համալսարանի սեփականատեր, դա օրենքը թույլ է տալիս։ Եվ եթե վերահսկիչ պալատի նախագահը չգիտի Սահմանադրությունը, որ դա ինձ օրինական հասնում է, և ես այդ օրենքից եմ օգտվում, դա արդեն իր բացթողումն է: Երկրորդ, ես այս խնդիրը չեմ կապում հենց «Անանիա Շիրակացու» հետ և մեծ հաճույքով բոլորիդ կհրավիրեմ այնտեղ՝ ցույց տալու պայմանները, որ դուք ինքներդ համոզվեք, որ այն փաստերը, որ իրենք բերում են, բացարձակ սուտ է։ Եվ ես կխնդրեի համալսարանի անունն այդ հայտարարության հետ ընդհանրապես չկապել: Այստեղ այնքանով է առնչվում, որ ես իմ հայտարարությունն անելուց, քանի որ կոնկրետ փաստ և կոնկրետ մարդ է, որն ինձանից՝ որպես այդ խորհրդի նախագահ, պահանջել է այդ գումարը՝ 4000 դոլարը, և ես կաշկանդված չեմ և կարող եմ հայտարարել. այդ է պատճառը, որ բերեցի այդ օրինակը:

-Ո՞վ է այդ մարդը: Անունը կասե՞ք:

-Կգա, դատարանում ամեն ինչ կասենք, իրենց աշխատակիցն է: Ինչ վերաբերում է իմ հայտարարությանը, ես ավելի շատ ուշադրություն դարձրեցի  այն բանին, որ այդ գործելաոճն աշխատում է արդեն մի քանի տարվա ընթացքում: Դա առաջին դեպքը չէ, որ տարբեր համայնքներում, տարբեր ինչ-որ հիմնարկություններում ստուգելուց կա այդպիսի երևույթ, և այդ երևույթից կախված՝ շատ-շատ պաշտոնյաներ, իհարկե, վախենում են բարձրաձայնել կամ այդ երևույթի մասին խոսել:

-Դուք միայն կոռուպցիա՞ն նկատի ունեք, թե՞ քաղաքական ենթատեքստ էլ կա ձեր հայտարարության մեջ:

-Ես նկատի ունեմ կոռուպցիան առաջին հերթին։ Իհարկե, նաև նկատի ունեմ քաղաքական կոնտեքստում և իհարկե՝ Վերահսկիչ պալատում, որովհետև բոլոր պետական կառույցներն էլ հասկանում են, որ ամեն խնդրի շուրջ բյուջեի հետ կապված բոլոր ծախսերը, տուրքերը, մուտքերը, ելքերը վերջում գալիս է վերստուգելու Վերահսկիչ պալատը։ Եվ եթե կա այն մթնոլորտը բոլորի մոտ, որ կարելի է անել ամեն ինչ, հետագայում Վերահսկիչ պալատի հետ լեզու գտնել, և այդ ամենը ծածկել-գնալ, այդ կոռուպցիան միշտ էլ զարգանալու է և լինելու է: Մեղադրել, որ մեր համայնքապետերը բոլորը գողեր են, ավազակներ են, կամ մեր նախարարները բոլորը թալանչի են։ Դա մեծ տգիտություն է, որովհետև ամեն ինչ գալիս է համակարգից: Եթե իրենց վերահսկող մարմինը թույլ է տալիս այդ ամենն անել, հետո իրենց հետ հարցերը կարգավորել, պարզ բան է, որ բոլորն էլ թալանելու են։ Ում էլ տանեն դնեն գյուղապետ, քաղաքապետ, եթե այդ հնարավորությունն ունի, օգտվելու է դրանից:

-Վերահսկիչ պալատը սրա մասին բարձրաձայնել է դեռևս մայիսին: Ինչո՞ւ էիք մինչ այսօր լռում:

-Նորից եմ ասում՝ «Անանիա Շիրակացին» ընդամենը կոնկրետ փաստն է, որը ես ասել եմ: Ինչո՞ւ ենք մայիսից մինչև հիմա լռել: Որովհետև մայիսին տեղի ունեցած այդ ստուգումների ժամանակ, նախ, առաջինը ես իրենց ասել եմ, որ դա ձեր իրավասություններից դուրս է, ինչպես նաև երեկ դա շեշտեցի իմ հարցադրման ժամանակ, որ Վերահսկիչ պալատը որևէ իրավունք չունի մտնել՝ Սևանի տարածքային հարկային տեսչության տարածքում ստուգելու բոլոր կազմակերպությունները, որոնք ցանկանում է: Դրա համար մենք ունենք պետեկամուտների կոմիտե, կարող եք նրա հետ ձեր հարցերը կարգավորել, բայց տնտեսվարող սուբյեկտին իրավունք ունի ստուգելու պետեկամուտների կոմիտեն, և իրենք իրենց լիազորությունները բարձրացնելով, այդ լիազորությունն իրենց վերապահելով՝ մտել են ստուգել: Երկրորդ խնդիրը, որ ես բարձրացրեցի՝ հարց տվեցի, թե ինչո՞ւ կողմնակալ վերաբերմունք կա տարբեր նախարարների կամ տարբեր համայնքների նկատմամբ: Եթե նկատեցիք, պարոն Զաքարյանն ինձ պատասխանեց, ավելի շուտ փորձեց պատասխանել և շրջանցեց ու ասաց մի այսպիսի միտք՝ մենք անկողմնակալ կամ կողմնակալ վերաբերմունք որևէ մեկի նկատմամբ չունեինք և բացարձակ չենք էլ ունենալու: Այսինքն, օրենքում հստակ գրված է, որ ՎՊ-ը պետք է լինի անկողմնակալ՝ անկախ նրանից՝ իրեն հարազատ-բարեկա՞մն է, թե՞ իր քաղաքական ուժից է: Նա պետք է ունենա անկողմնակալ վերաբերմունք բոլորի նկատմամբ: Սա իր խոսքերն են:

-Հիմա դուք Վերահսկիչ պալատին մեղադրում եք կողմնակալությա՞ն մեջ:

-Ես մեղադրում եմ և՛ կողմնակալության մեջ, և՛ կոռուպցիայի մեջ, որը գործում է, և այդ փաստը կա՝ կա երևույթ վերահսկիչ պալատում, որի դեմ հարկավոր է պայքարել:

-Փաստեր, ձայնագրություններ ունե՞ք:

-Ինչի, ես անվտանգության աշխատո՞ղն եմ՝ ձայնագրեմ: Կգան իրավապահ մարմինները, կպարզեն ամեն ինչ: Ես երեկ դիմել եմ և՛ դատախազությանը, և՛ ազգային անվտանգությանը...

-Բանավո՛ր։ Իսկ գրավո՞ր:

-Կարող եմ և գրավոր դիմել: Ես այսօր ուզում էի իմ ելույթի ժամանակ, բայց որոշեցի այլ կերպ դա անել: Խնդրելու եմ խորհրդարանին, որ ինձ զրկեն անձեռնմխելիությունից, որ հետագայում որևէ մեկը չասի, թե անկաշկանդ եմ կամ խոչընդոտ եմ առաջացնում այդ քննությունը մինչև վերջ տանելու համար:

-Ի՞նչ հիմնավորմամբ են զրկելու ձեզ:

-Իմ դիմումի համաձայն: Որ ոչ մեկն իրավապահ մարմիններից չասի, թե պատագամավոր է՝ չի գալիս բացատրություն տալու կամ խուսափում է և այլն, և այլն:

-Իսկ ե՞րբ եք դիմում ներկայացնելու:

-Մոտակա ժամանակ:

-Վկաներ ունե՞ք:

-Իհարկե՝ ունենք:

-Պարո՛ն Մելիքյան, սրա քաղաքական ենթատեքստը ո՞րն է:

-Ես մեկ էլ եմ ասում: Բանը նրանում էր, որ ստուգումից հետո և այն հայտարարությունից հետո, որը եղել է մի 10 օր առաջ, մենք՝ որպես համալսարանի ներկայացուցիչ, հաշվի էլ չառանք դա, որովհետև գտանք, որ դա մեզ համար՝ եղած թե չեղած. ո՛չ վնաս տվեց, ո՛չ էլ: Խնդիրը բարձրացավ այն ժամանակ, երբ ՎՊ-ն բոլորին մեղադրում է կոռուպցիայի, յուրացման, գողության, ամեն ինչի մեջ։ Բայց երբ դա անում է մի կառույց, որն ինքը դեմ է այդ ամեն կոռուպցիային, ես կհասկանայի։ Բայց եթե իրենք խրված են այդ կոռուպցիայի մեջ և մեղադրում են մնացածին, դա արդեն անհասկանալի երևույթ է:

-Դուք բոլորի՞ անունից եք խոսում:

-Բոլորի անունից՝ ո՞ւմ նկատի ունեք: Ես խոսում եմ իմ անունից, դա իմ տեսակետն է և որևէ կապ չունի ՀՀԿ-ի տեսակետի հետ:

-Պարո՛ն Մելիքյան, իսկ ինչպե՞ս եք վերաբերվում Իշխան Զաքարյանի հայտարարությանը, թե ՎՊ ստուգումների արդյունքում ոսկորը շատերի կոկորդում է մնում:

-Ես կարծում եմ՝ այդպիսի հայտարարություն անելուց լավ կլիներ այդ «շատերի» բառի փոխարեն կոնկրետ ազգանուն տալ. օրինակ ասել՝ ա՛յ, այս նախարարին պատժել ենք, իրենց կոկորդին է մնացել, իրենք էլ Մելիքյանին հրահրել են, որ Մելիքյանը նման հայտարարություն անի: Ա՛յ, այդ ժամանակ ես կհասկանայի, որ դա նորմալ զրույց է, որի համար մարդուն կարելի է պատասխանատվության ենթարկել։ Իսկ երբ բոլորը ավազակ են, գող են, բայց կոնկրետ անուն չենք տալիս, նրանցից կոնկրետ հարց տվող էլ չկա, բա ինչո՞ւ չես ասում: Ես կոնկրետ եմ ասել և կոնկրետ իմ ասածի համար պատասխանատու եմ:

-Իսկ ինչո՞ւ նախարարները չեն բողոքում, դուք եք բողոքում:

-Նախ, ամեն նախարար թող ինքը որոշի՝ ինչո՞ւ չի բարձրաձայնում այդ հարցը, որովհետև դա կախված է իրենց գործելաոճից:

-Սցենարն այնքան հստակ նկարագրեցիք, որ ձեզ, հնարավոր է, հրահրել են: Դա հնարավո՞ր է:

-Իհարկե՝ ո՛չ: Իմ պարագայում կոնկրետ՝ դա իմ տեսակետն է, ոչ թե ՀՀԿ-ի։ Եվ ինչ-որ ձևով որ  ինչ-որ մեկին հրահրի, առաջինը՝ ես այն անլուրջ մարդու տպավորությունը չեմ թողել, որ ինչ-որ մեկը կարող է ինձ հրահրել, ինչ-որ մի բան խոսել, ինչի համար հարկավոր է պատասխան տալ, բայց տեղյակ չես, թե ինչի համար պետք է պատասխան տաս:

-Պարո՛ն Մելիքյան, համալսարանը, որպես սեփականատեր, հավատարմագրային կառավարության հանձնե՞լ եք:

-Իհարկե՛: Այնտեղ կա ռեկտոր, պրոռեկտոր, գիտական խորհուրդ, որոնք զբաղվում են այդ համալսարանի կառավարմամբ: Ես ընդհանրապես այնտեղ չեմ խառնվում:

-Ձեր խմբակցության անդամներն ինչպե՞ս են վերաբերվում ձեր հայտարարություններին: Դժգոհություններ կա՞ն, թե ինչու եք նման հայտարարություն արել:

-Ո՛չ, նման որևէ ճնշում կամ առաջարկություն չի եղել և, կարծում եմ, երևի չի էլ լինի, որովհետև ամեն պատգամավոր պարտավոր է ինքն իր համար պատասխան տալ:

-Իսկ աջակցություն եղե՞լ է:

-Երևի դուք ինքներդ եք հասկացել, որ այն, ինչ ես բարձրաձայնել եմ, խորհրդարանի 90%-ը դրա հետ համաձայն է, բայց տարբեր պայմաններից ելնելով՝ չի բարձրաձայնում: Ես նորություն չեմ հայտնաբերել, ընդամենը ասել եմ այն, ինչ շուտվանից կա:

-Իսկ անձամբ ձեզանի՞ց են պահանջել այդ 4 000 դոլարը։

-Անձամբ ինձանից է պահանջել։

-Եթե Իշխան Զաքարյանն այդպիսի ելույթով հանդես չգար, նախարարներին, համայնքապետերին չքննադատեր, Դուք չէի՞ք բացահայտի տեղի ունեցածը։

-Ես ուղղակի պատրաստվում էի մի հատ իրեն հանդիպել։ Ընդհանրապես, ես չեմ սիրում նման աղմուկներ անել։ Մինչև հիմա էլ քանի դեպքեր եղել են տարբեր նախարարների հետ, հարց է եղել, գնացել եմ, այդ խնդիրները կարգավորել։ Այդպես էլ մտածում էի, որ հարմար ժամանակ գտնեմ ու հանդիպեմ, մի հատ բացատրեմ, որ այդպես չի կարելի անել։ Բայց քանի որ երեկ իրանց ասելով՝ մեր բոլոր համայնքապետերին հարկավոր է նստացնել բերդ, բոլոր նախարարները թալանչի են, մեջներից սուրբն իրենք են, ես էլ ուզեցի ցույց տամ, որ մեջների ամենամեծ կոռումպացված համակարգն ինքն է։

-Իսկ չե՞ք կարծում, որ հենց հանրապետության նախագահ Սերժ Սարգսյանի անունից է ՎՊ-ն այսպիսի ստուգումներ իրականացնում,  այդպիսի հայտարարություններ անում։

-Սո՛ւտ է, չի՛ կարող պատահել, այդպիսի բան լինել։ Ես համոզված եմ, որ նման բան չի կարող լինել։

-Հիմա ի՞նչ է ստացվում՝ Իշխան Զաքարյանն «առյուծի կա՞թ» է խմել, որ այդպիսի հայտարարություններ է անում։

-Ո՛չ, ուղղակի ինքն իր լիազորություններն օգտագործում է իր անձնական շահերի համար, ուրիշ ոչ մի խնդիր։

Ներկայացրեց Արփի Բեգլարյանը