Լրագրողների հետ հանդիպման ժամանակ անդրադառնալով Աստանայում ԼՂՀ վերաբերյալ ԵԱՀԿ Մինսկի խմբի անդամ երկրների և Հայաստանի ու Ադրբեջանի համատեղ հայտարարությանը՝ ՀԱԿ համակարգող Լևոն Զուրաբյանն ասել է, թե այն արձանագրում է արտաքին ճակատում իշխանությունների ձախողումները։

-Հանգրվանային այս հայտարարությունը, ըստ էության, ամփոփում է Սերժ Սարգսյանի պաշտոնավարության ժամանակաշրջանում ղարաբաղյան կարգավորման գործընթացում տեղի ունեցած տեղաշարժերը, իսկ հայտարարության տակ Սերժ Սարգսյանի ստորագրությունը նշանավորում է Հայաստանի իշխանությունների պաշտոնական համաձայնությունը կարգավորման քննարկվող ծրագրի վերաբերյալ և արձանագրում հայ դիվանագիտության կողմից այս տարիների ընթացքում թույլ տրված անընդունելի նահանջները,-նշել է նա։

Ըստ Լևոն Զուրաբյանի՝ ՀԱԿ-ը կարծում է, թե որպես կործանարար նահանջ կարելի է համարել այն, որ Հայաստանը շարունակել է ԼՂ-ն որպես բանակցություների լիիրավ կողմ ճանաչելու ԵԱՀԿ-ի 1994թ. որոշումն անտեսելու քաղաքականությունը։

-Երկրորդ, համաձայնելով տարածքային ամբողջականության և ժողովուրդների ինքնորոշման սկզբունքների միաժամանակյա կիրառմանը՝ Հայաստանը պաշտոնապես իր համաձայնությունն է տվել, որ ղարաբայան հակամարտությունը կարգավորվի Ադրբեջանի տարածքային ամբողջականության շրջանակներում։ Երրորդ, օրակարգից հանվել է հանրաքվեի դրույթը և  փոխարինվել «կամաարտահայտություն» անհստակ ձևակերպմամբ։ Չորրորդ, անհստակ և անբավարար լուծում է տրվում Հայաստան-ԼՂ ցամաքայի կապի՝ Լաչինի միջանցքի սահմանման հարցին։ Հինգերորդ, եթե նախկինում խոսվում էր միայն վերադարձվող տարածքների դեմիլիտարիզացիայի մասին, ապա այսօր խոսքը գնում է այդ տարածքները Ադրբեջանի վերահսկողությանը հաձնելու մասին։ Վեցերորդ, եթե նախկինում  խոսվում էր միայն վերադարձվող տարածքներ փախստականների վերադարձի մասին, ապա այժմ խոսվում է նրանց վերադարձի մասին բուն ԼՂ։ Յոթերորդ, կարգավորման հրապարակված սկզբունքներում ոչ մի խոսք չկա շրջափակումների վերացման մասին։ Ութերորդ, ստորագրելով Աստանայի հայտարարությունը՝ Սերժ Սարգսյանը համաձայնել է Մուսկոկայի հայտարարության մեջ օգտագործվող «օկուպացված տարածքներ» տերմինաբանությանը, որը մինչ այսօր չի օգտագործվել ո՛չ ԵԱՀԿ փաստաթղթերում, ո՛չ եռանախագահության հայտարարություններում,-հայտարարել է նա։

Լևոն Զուրաբյանը պնդել է, թե չնայած այս զիջումներին՝ Հայաստանը չի հասել նրան, որ Ադրբեջանը կառուցողականություն ցուցաբերի, այլ ընդհակառակը, այսօր ադրբեջանական կողմը նորանոր զիջումներ է պահանջում։

-Ակնհայտ է, որ Սերժ Սարգսյանի ռեժիմի գոյատևման ամեն օրը նորանոր հարվածներ է բերում ազգային անվտանգությանը։ Իրավիճակը կարող է փոխել միայն Սերժ Սարգսյանի հրաժարականը և լեգիտիմ իշխանութունների ձևավորումը արտահերթ ընտրությունների միջոցով,-եզրափակել է նա։

7or.am