Ոստիկանության՝ Կազմակերպված հանցավորության դեմ պայքարի գլխավոր վարչության (ԿՀԴՊ ԳՎ) պետ, ոստիկանության գնդապետ Հունան Պողոսյանը լրագրողների հետ հանդիպման ժամանակ նշել է, որ կոռուպցիայի և տնտեսական հանցագործությունների դեմ տարվող պայքարի շրջանակներում իրականացված աշխատանքների արդյունքում վերջին տարիներին հանրապետությունում կոռուպցիայի բացահայտման բավական մեծ աճ է գրանցվել։

Եթե 2007-ին իրավապահ մարմինների կողմից ձեռնարկված միջոցառումների արդյունքում գրանցվել էր 171 կոռուպցիոն հանցագործություն, ապա 2008-ին գրանցվել է 392, իսկ 2009-ին այդ ցուցանիշն աճել է 158 դեպքով կամ 40,3%-ով և հասել 550-ի: Նշված 550 հանցագործություններից 418-ը կամ 76%-ը հայտնաբերվել է ՀՀ ոստիկանության կողմից, ընդ որում՝ 81-ը կամ 14%-ը՝ ԿՀԴՊ ԳՎ-ի:
2009-ին Հայաստանի Հանրապետությունում գրանցված 550 կոռուպցիոն հանցագործություններից 90-ը յուրացման, 10-ը՝ առևտրային կաշառքի, 159-ը՝ հարկերը վճարելուց չարամտորեն խուսափելու, 95-ը՝ պաշտոնական կեղծիքի, 79-ը՝ պաշտոնական լիազորություններն անցնելու և չարաշահելու, 56-ը՝ կաշառակերության, 52-ը՝ առևտրային կամ այլ կազմակերպությունների ծառայողների կողմից լիազորությունները չարաշահելու, 8-ը՝ պետական կամ համայնքային սեփականություն հանդիսացող հողամասերի ինքնակամ զավթումը կասեցնելու ուղղությամբ միջոցներ չձեռնարկելու, 1-ը խաբեությամբ գույքային վնաս պատճառելու դեպքեր են:

7or.am