Սոցիալական իրավունքի Եվրոպայի կոմիտեի անդամ, սոցիոլոգ  Լյուդմիլա Հարությունյանը լրագրողների հետ հանդիպման ժամանակ պատասխանելով այն հարցին, թե ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի կողմից Հայոց ցեղասպանության ճանաչման մասին 252-րդ բանաձևի ընդունումն ինչպե՞ս կանդրադառնա հայ-թուրքական հարաբերությունների վրա՝ ասել է, թե այսօր հայ-թուրքական հարաբերություններ գոյություն չունեն։

-Այս չնչին խոսակցությունը  հայ-թուրքական սահմանի բացման ուղղությամբ հարաբերություն կոչելը դժվար է այն պարզ պատճառով, որ մենք խոսում ենք մի բանի մասին, որը վաղուց կատարված պետք է լիներ. Թուրքիան վաղուց պիտի բացեր սահմանը։ Ի՞նչ է նշանակում Դավութօղլուի վերջին հայտարարությունը, որտեղ ուղիղ տեքստով ասում է, թե սահմանը երեք ամիս հետո նորից կփակեն, երբ Ղարաբաղում պատերազմ սկսվի։ Մի՞թե Թուրքիան մասնակից է այդ պատերազմին,-նշել է նա։

Ըստ Լյուդմիլա Հարությունյանի՝ ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի կողմից Հայոց ցեղասպանության ճանաչման մասին 252-րդ բանաձևի ընդունումը միայն հոգեբանական ճնշում է գործադրում Թուրքիայի վրա։

-Այս հոգեբանական գործոնն օգնելու է Թուրքիային հասկանալ, որ Եղեռնի ճանաչման ժամանակը գալիս է, և Թուրքիայի նոր սերունդն այս ուղերձն ավելի հեշտ է ընկալում,-նշել է նա։

Լյուդմիլա Հարությունյանի խոսքերով՝ հայ-թուրքական հարաբերությունները չեն կարգավորվի այնքան ժամանակ, մինչև Թուրքիան չընդունի Ցեղասպանությունը, և մենք էլ պատրսատ չլինենք ընդունելու այդ մեղայականը։

7or.am