ԱՄՆ կոնգրեսի ներկայացուցիչների պալատի արտաքին հարաբերությունների հանձնաժողովի կողմից Հայոց ցեղասպանության ճանաչման բանաձևի ընդունումից անմիջապես հետո Թուրքիան հետ է կանչել ԱՄՆ-ում իր դեսպանին։

Հիշեցնենք, որ մարտի 4-ին արդեն իսկ հայտարարվել էր, որ եթե Առաջին համաշխարհային պատերազմում հայերի սպանությունները ԱՄՆ կոնգրեսականները ճանաչեն որպես Ցեղասպանություն Թուրքիան հետ կկանչի ԱՄՆ-ում Թուրքիայի դեսպանին։

Իր հերթին Թուրքիայի արտգործնախարար Ահմեդ Դավութօղլուն սպառնացել էր հայ-թուրքական գործընթացի ձախողմամբ։

«Քաղաքականության և դիվանագիտության մեջ ես պատահականությունների չեմ հավատում։ Միացյալ Նահանգների կոնգրեսականների՝ ԱՄՆ Կոնգրեսի քննարկմանը ներկայացրած, այսպես կոչված, Հայոց ցեղասպանության հարցն իհարկե ճնշման ձև է։ Սակայն բոլորը պետք է իմանան, որ Թուրքիան այն երկիրը չէ, որի հետ կարելի է խոսել ճնշման լեզվով,-ասել էր նա,- պետք չէ մեզ շանտաժի ենթարկել ապրիլի 24-ով. եթե ինչ-որ մեկն ուզում է մեզ վրա ճնշում գործադրել, դա ապարդյուն է։ Թուրքիան ինքնաբավ երկիր է և որոշումներ ընդունում է՝ ելնելով իր ազգային շահերից։ Եվ եթե ամերիկացիները կդիմեն նման մեթոդների, ապա մենք պաշտոնապես հայտարարում ենք՝ հայ-թուրքական հարաբերությունների գործընթացը կձախողվի»։

7or.am