Հատուկ քննչական ծառայությունում ավարտվել է ոստիկանության՝ Երևանի վարչության   ՔՀ խմբի կրտսեր օպերլիազորի  կողմից խուլիգանություն կատարելու  դեպքի առթիվ հարուցված քրեական գործի նախաքննությունը:
Քրեական գործի նախաքննության օրինականության նկատմամբ  հսկողություն իրականացնող դատախազը հաստատել է  մեղադրական եզրակացությունը:

Նախաքննությամբ պարզվել է, որ  ոստիկանության՝  Երևանի վարչության  Մաշտոցի բաժնի Դավիթաշեն բաժանմունքի  ՔՀ խմբի կրտսեր օպերլիազոր  Գևորգ Գրիգորյանը 2009թ. դեկտեմբերի 18-ին՝ 03:20-ի սահմաններում, ալկոհոլի ազդեցության տակ,   «Օմեգա»    գիշերային ակումբի դիմաց  վիճաբանել է  հիշյալ ակումբի  անվտանգության աշխատակիցներ Տ. Հովակիմյանի և  Ռ. Կիրակոսյանի  հետ, հայհոյել  և իրեն ամրակցված  «Մակարով» տեսակի ատրճանակից  անկանոն 2  կրակոց արձակել: 

Բացի այդ՝ Գ. Գրիգորյանը  վիճաբանել է  նաև դեպքի վայր ժամանած «Պանտեռա սիքյուրիթի» ՍՊ ընկերության  աշխատակիցներ Գ. Կիրակոսյանի և  Կ. Հովհաննիսյանի, ինչպես նաև  ակումբի  անվտանգության  մյուս աշխատակից  Հ. Գալստյանի  և  դեպքի վայր վերադարձած     Տ. Հովակիմյանի և  Ռ. Կիրակոսյանի   հետ: Վիճաբանության ժամանակ   Գ. Գրիգորյանը  ձեռքով հարվածել է  Տ. Հովակիմյանի դեմքին՝ նրա առողջությանը  պատճառելով թեթև վնասվածք: Այնուհետև Գ. Գրիգորյանը  փորձել է կրկին զենք գործածել,  բայց վերը նշված անձինք  ուժի գործադրմամբ   կանխել են նրա խուլիգանական  գործողությունները և ատրճանակը խլել:

Ձեռք բերված ապացույցների հիման վրա՝ Գ. Գրիգորյանին  մեղադրանք է առաջադրվել  ՀՀ քրեական օրենսգրքի  258-րդ հոդվածի 4-րդ մասով:
Քրեական գործն  ուղարկվել է Երևանի Կենտրոն և Նորք-Մարաշ վարչական շրջանների ընդհանուր  իրավասության առաջին ատյանի դատարան՝ ըստ էության քննելու համար:

ՀՀ գլխավոր դատախազություն