ՀՀ 2010 թվականի պետական բյուջեի հունվար ամսվա եկամուտները կազմել են 51.1 մլրդ դրամ, իսկ ծախսերը՝ 38.6 մլրդ դրամ, որոնք ապահովել են ՀՀ կառավարության կողմից առաջին եռամսյակի համար հաստատված ծրագրի համապատասխանաբար 34.6 և 21.4 տոկոսը: Պետական բյուջեի տարեկան ծրագրային ցուցանիշները կատարվել են եկամուտների գծով' 7.2%-ով, ծախսերի գծով' 4.6%-ով:

Նախորդ տարվա հունվար ամսվա համեմատ պետական բյուջեի եկամուտներն աճել են 22.3%-ով կամ 9.3 մլրդ դրամով: Ընդ որում, 14.6%-ով (5.1 մլրդ դրամով) ավելացել են հարկերը և տուրքերը, 41.7%-ով (2.0 մլրդ դրամով)՝ պարտադիր սոցիալական ապահովության վճարները, իսկ այլ եկամուտներն աճել են 2.1 անգամ կամ 2.2 մլրդ դրամով:

Պետական բյուջեի եկամուտների 78.6%-ը ձևավորվել է հարկերի և տուրքերի, 13.3%-ը' պարտադիր սոցիալական ապահովության վճարների, 8.1%-ը' այլ եկամուտների հաշվին: «Հայաստանի Հանրապետության 2010 թվականի պետական բյուջեի մասին» ՀՀ օրենքի 9-րդ հոդվածի 11-րդ կետին համապատասխան պետական բյուջեում ներառվել են նաև պետական հիմնարկների արտաբյուջետային ֆոնդերի միջոցները, որոնց եկամուտները հաշվետու ժամանակահատվածում կազմել են շուրջ 1.3 մլրդ դրամ:

2010 թվականի հունվար ամսին պետական բյուջե մուտքագրված հարկերն ու տուրքերը կազմել են շուրջ 40.2 մլրդ դրամ և 34.4%-ով ապահովել եռամսյակային ծրագիրը: 2009 թվականի հունվարի համեմատ նշված եկամուտներն աճել են 14.6%‑ով կամ 5.1 մլրդ դրամով, ինչը հիմնականում պայմանավորված է ավելացված արժեքի հարկի և եկամտահարկի աճով:

Հարկերի ու տուրքերի 54.4%-ն ապահովվել է ավելացված արժեքի հարկի հաշվին, որը կազմել է 21.9 մլրդ դրամ և 20.5%-ով կամ 3.7 մլրդ դրամով գերազանցել նախորդ տարվա նույն ցուցանիշը: Ընդ որում, մուտքերի աճը ապահովվել է հիմնականում ներքին շրջանառության հաշվին: ԱԱՀ-ի մուտքերից ավելի քան 13 մլրդ դրամը ստացվել է ՀՀ սահմանին հարկումից, 8.8 մլրդ դրամը' ներքին շրջանառությունից:

Պետական բյուջեի հարկերի ու տուրքերի 8.8%-ն ապահովվել է ակցիզային հարկի հաշվին՝ կազմելով ավելի քան 3.5 մլրդ դրամ: Մասնավորապես' հանրապետություն ներմուծված ենթաակցիզային ապրանքների հարկումից ստացվել է 2.6 մլրդ դրամ, որից 1.15 մլրդ դրամը' բենզինի և դիզելային վառելիքի, 1.1 մլրդ դրամը՝ ծխախոտի ներմուծման հարկումից: Հանրապետությունում արտադրվող ենթաակցիզային ապրանքների հարկումից պետական բյուջեի մուտքերը կազմել են 925.6 մլն դրամ, որից 275.8 մլն դրամը ստացվել է ներքին արտադրության ծխախոտի իրացումից: Նախորդ տարվա հունվար ամսվա համեմատ ակցիզային հարկի մուտքերն աճել են 8.9%-ով կամ 289.3 մլն դրամով, ինչը հիմնականում պայմանավորված է բենզինի և դիզելային վառելիքի ներմուծումից ստացված հարկերի աճով:

Հունվար ամսվա պետական բյուջեի հարկային եկամուտների 11.5%-ն ապահովվել է շահութահարկի հաշվին՝ կազմելով 4.6 մլրդ դրամ: Նախորդ տարվա համեմատ շահութահարկի մուտքերն աճել են 17.8%-ով կամ 695.9 մլն դրամով: Աճը հիմնականում պայմանավորված է ոչ ռեզիդենտների, մեկ տոկոս դրույքաչափով և ոչ պետական ձեռնարկությունների կողմից վճարված շահութահարկի աճով:

2010 թվականի հունվար ամսին ՀՀ պետական բյուջե մուտքագրված եկամտահարկը կազմել է 4.4 մլրդ դրամ' ապահովելով հարկերի ու տուրքերի 11.1%-ը: Նախորդ տարվա հունվարի համեմատ եկամտահարկի մուտքերն աճել են 43.8%-ով կամ 1.4 մլրդ դրամով:

Հաշվետու ժամանակահատվածում մաքսատուրքի գծով մուտքերը կազմել են 2 մլրդ դրամ՝ 21%-ով կամ 541.8 մլն դրամով զիջելով 2009 թվականի հունվար ամսվա ցուցանիշը:

2010 թվականի հունվար ամսվա ընթացքում պետական տուրքից պետական բյուջեի մուտքերը կազմել են շուրջ 916.2 մլն դրամ կամ առաջին եռամսյակի համար ծրագրված մուտքերի 23.7%-ը: Նախորդ տարվա նույն ժամանակահատվածի համեմատ այն նվազել է 29.1%-ով կամ 376.2 մլն դրամով, ինչը հիմնականում պայմանավորված է ՀՀ-ից օդային տրանսպորտի միջոցներով ֆիզիկական անձանց ելքի, ֆիզիկական անձանց տրվող իրավաբանական նշանակություն ունեցող փաստաթղթերի, որոշակի ծառայությունների կամ գործողությունների և հյուպատոսական ծառայությունների կամ գործողությունների իրականացման համար գանձվող տուրքերի նվազմամբ:

Գործունեության առանձին տեսակներից գանձված հաստատագրված վճարները հունվար ամսին կազմել են 1.7 մլրդ դրամ' 11.5%-ով կամ 172.8 մլն դրամով գերազանցելով 2009 թվականի համապատասխան ցուցանիշը: Աճը հիմնականում պայմանավորված է խաղատների գործունեության կազմակերպման և դրամական շահումով խաղային ավտոմատների շահագործման համար գանձվող հաստատագրված վճարների աճով:

2010 թվականի հունվար ամսվա ընթացքում ՀՀ պետական բյուջե են մուտքագրվել 547.7 մլն դրամ բնօգտագործման և բնապահպանական վճարներ: Նախորդ տարվա նույն ժամանակահատվածի համեմատ նշված մուտքերն աճել են 21.5%-ով' հիմնականում պայմանավորված օգտակար հանածոների արդյունահանման համար գանձվող վճարների աճով:

Հունվար ամսվա ընթացքում պետական բյուջե են մուտքագրվել 545.2 մլն դրամ այլ հարկեր: Մասնավորապես' 145.9 մլն դրամ են կազմել □Կոնցեսիայի մասին□ ՀՀ օրենքով սահմանված կոնցեսիոն վճարը, 146.4 մլն դրամ' ճանապարհային վճարները, 107.2 մլն դրամ' հանրային ծառայությունների կարգավորման պարտադիր վճարները, 53.7 մլն դրամ' «Հարկերի մասին» ՀՀ օրենքի խախտման համար սահմանված տուգանքները և 87.4 մլն դրամ' ՀՀ կառավարությանն առընթեր հարկային պետական ծառայության նյութական խրախուսման ֆոնդի եկամուտները: Նախորդ տարվա հունվար ամսվա համեմատ այլ հարկերի փաստացի ցուցանիշը գրեթե փոփոխություն չի կրել:

Պարտադիր սոցիալական ապահովության վճարների գծով բյուջետային եկամուտները կազմել են շուրջ 6.8 մլրդ դրամ և 30.7%-ով ապահովել եռամսյակային ծրագիրը: 2009 թվականի նույն ժամանակահատվածի համեմատ պարտադիր սոցիալական ապահովության վճարներն աճել են 41.7%-ով կամ շուրջ 2 մլրդ դրամով:

Հաշվետու ժամանակահատվածում պետական բյուջեի այլ եկամուտները կազմել են 4.2 մլրդ դրամ և 68.5%-ով ապահովել եռամսյակային ծրագրային ցուցանիշը: 2009 թվականի նույն ժամանակահատվածի համեմատ այլ եկամուտներն աճել են 2.1 անգամ, որը հիմնականում պայմանավորված է բանկերում և այլ ֆինանսավարկային հաստատություններում բյուջեի ժամանակավոր ազատ միջոցների տեղաբաշխումից և դեպոզիտներից ստացվող տոկոսավճարների աճով:

2010 թվականի հունվար ամսվա ընթացքում արտաքին աղբյուրներից պաշտոնական դրամաշնորհներ չեն ստացվել:

2010 թվականի հունվարին ՀՀ պետական բյուջեի միջոցների հաշվին կատարվել են ավելի քան 38.6 մլրդ դրամի ծախսեր' կազմելով եռամսյակային ծրագրի 21.4%-ը: Մասնավորապես' 34.7 մլրդ դրամ են կազմել ընթացիկ ծախսերը, շուրջ 4 մլրդ դրամ' ոչ ֆինանսական ակտիվների հետ գործառնությունները: 2009 թվականի նույն ժամանակահատվածի համեմատ բյուջեի ծախսերն ավելացել են 12%-ով կամ 4.1 մլրդ դրամով: Աճը հիմնականում պայմանավորված է ոչ ֆինանսական ակտիվների գծով ծախսերի և պետական պարտքի սպասարկման ծախսերի ավելացմամբ:

Ընթացիկ ծախսերը հաշվետու ժամանակահատվածում կազմել են 34.7 մլրդ դրամ' 20.8%-ով կատարելով եռամսյակային ծրագիրը: Նախորդ տարվա հունվարի համեմատ ընթացիկ ծախսերր նվազել են 1.8%-ով կամ 640.3 մլն դրամով: Ընթացիկ ծախսերից շուրջ 2.1 մլրդ դրամն ուղղվել է պետական հիմնարկների աշխատողների աշխատավարձերի վճարմանը, 27.5 մլն դրամը' պարտադիր սոցիալական ապահովության վճարներին, որոնք կազմել են եռամսյակային ծրագրի համապատասխանաբար 15.4%-ը և 3%-ը: Նախորդ տարվա նույն ժամանակահատվածի համեմատ նշված ծախսերը նվազել են համապատասխանաբար 2.7%‑ով և 49.6%-ով: Ծառայությունների և ապրանքների ձեռքբերմանը պետական բյուջեից հատկացվել է ավելի քան 267 մլն դրամ, որը 64.3%‑ով պակաս է նախորդ տարվա նույն ցուցանիշից: Հաշվետու ժամանակահատվածում ավելի քան 1.8 մլրդ դրամ հատկացվել է պետական պարտքի սպասարկմանը' կազմելով եռամսյակային ծրագրի 24.9%-ը: Մասնավորապես' նշված գումարից շուրջ 1.6 մլրդ դրամը տրամադրվել է ներքին, 275.2 մլն դրամը՝ արտաքին պարտքի սպասարկմանը: 2009 թվականի նույն ժամանակահատվածի համեմատ պետական պարտքի սպասարկման ծախսերն աճել են 3.5 անգամ կամ 1.3 մլրդ դրամով, որը մեծ մասամբ պայմանավորված է ներքին պետական պարտքի սպասարկման ծախսերի աճով: Անցած ժամանակահատվածում ՀՀ պետական բյուջեից տրամադրվել են 318.1 մլն դրամ սուբսիդիաներ' կազմելով եռամսյակային ծրագրի 8%-ը և 24%-ով զիջելով նախորդ տարվա նույն ցուցանիշը: Պետական բյուջեից տրամադրվել են 5.7 մլրդ դրամի դրամաշնորհներ, որից 5.4 մլրդ և 116.2 մլն դրամը պետական հատվածի այլ մակարդակներին տրամադրված ընթացիկ և կապիտալ դրամաշնորհներն են, 203.2 մլն դրամը' միջազգային կազմակերպություններին տրամադրված ընթացիկ դրամաշնորհները: Մասնավորապես' 2.7 մլրդ դրամ են կազմել համայնքների բյուջեներին համահարթեցման սկզբունքով տրվող դոտացիաները' 33.3%-ով ապահովելով եռամսյակային ծրագրի կատարումը: Նախորդ տարվա նույն ժամանակահատվածի համեմատ նշված ծախսերն ավելացել են 17.9%-ով: Իսկ դրամաշնորհների եռամսյակային ծրագիրն ընդհանուր առմամբ կատարվել է 26.5%-ով:

Հաշվետու ժամանակահատվածում պետական բյուջեի ընթացիկ ծախսերի 52.7%-ն ուղղվել է սոցիալական նպաստներին և կենսաթոշակներին, որոնք կազմել են 18.3 մլրդ դրամ կամ եռամսակային ծրագրի 30.5%-ը: Մասնավորապես' 14.6 մլրդ դրամ են կազմել կենսաթոշակները (32.8%), 3.7 մլրդ դրամ' նպաստները (24.1%): 2009 թվականի նույն ժամանակահատվածի համեմատ կենսաթոշակների գծով բյուջեի ծախսերը նվազել են 2.9%‑ով, իսկ նպաստները' աճել 9.9%-ով:

2010 թվականի հունվար ամսին պետական բյուջեի ոչ ֆինանսական ակտիվների հետ գործառնությունները կազմել են շուրջ 4 մլրդ դրամ կամ եռամսյակային ծրագրի 28.3%-ը' նախորդ տարվա -823.6 մլն դրամի դիմաց: Մասնավորապես' 3.9 մլրդ դրամ են կազմել ոչ ֆինանսական ակտիվների գծով ծախսերը' 2009 թվականի նույն ժամանակահատվածի 236.5 մլն դրամի դիմաց:

2010 թվականի հունվարին ՀՀ պետական բյուջեն կատարվել է շուրջ 12.5 մլրդ դրամ հավելուրդով՝ առաջին եռամսյակում ծրագրված 32.8 մլրդ դրամ պակասուրդի դիմաց: Նշենք, որ նախորդ տարվա նույն ժամանակահատվածում պետական բյուջեն կատարվել էր շուրջ 7.3 մլրդ դրամ հավելուրդով: Հաշվետու ժամանակահատվածում ֆինանսավորման ներքին աղբյուրների գծով արձանագրվել է 9.2 մլրդ դրամ հավելուրդ' նախորդ տարվա 4.4 մլրդ դրամի դիմաց: Ֆինանսավորման արտաքին աղբյուրների գծով անցած ժամանակահատվածում արձանագրվել է 3.3 մլրդ դրամ հավելուրդ' նախորդ տարվա 2.9 մլրդ դրամի դիմաց:

Դեֆիցիտի ֆինանսավորման ներքին աղբյուրներում 55.4 մլն դրամ են կազմել փոխառու միջոցներից (արժեթղթերից) զուտ մուտքերը: Մասնավորապես' 64.6 մլն դրամի զուտ մուտքեր են ապահովվել գանձապետական պարտատոմսերի թողարկումից: Մուրհակների մարման նպատակով եռամսյակային ծրագրով նախատեսված վճարումները 70.9%-ով կատարվել են' կազմելով 9.3 մլն դրամ: 2010 թվականի հունվար ամսին դեֆիցիտի ներքին ֆինանսական ակտիվները կազմել են ‑9.2 մլրդ դրամ: Տրամադրված վարկերի վերադարձից մուտքերը կազմել են ավելի քան 5.6 մլրդ դրամ (եռամսյակային ծրագրի 95.4%-ը), որի հիմնական մասը վճարվել է □Հայռուսգազարդ□ ԲԲԸ-ի կողմից: Ծախսերի նկատմամբ եկամուտների գերազանցման արդյունքում հունվար ամսվա ընթացքում 14.8 մլրդ դրամով ավելացել են ազատ բյուջետային միջոցները:

2010 թվականի հունվարին պետական բյուջեի արտաքին ֆինանսավորման գծով արձանագրվել է 3.3 մլրդ դրամ հավելուրդ կամ նախատեսվածի 25.9%-ը: Մասնավորապես' 2.8 մլրդ դրամ միջպետական վարկ է տրամադրվել ԼՂՀ-ին: Վրաստանի կողմից միջպետական վարկի գծով կատարվել է 44.8 մլն դրամի վճարում, որը հանդիսանում է նախորդ տարվա պարտավորությունը:

Արտաքին պարտավորությունների մարմանն ուղղվել է շուրջ 571.1 մլն դրամ, որը հատկացվել է Համաշխարհային բանկի աջակցությամբ իրականացվող ծրագրերի գծով պարտքի մարմանը: