Այսօր լրանում է 2008թ. նախագահական ընտրություններից հետո մարտի 1-ին տեղի ունեցած ողբերգական իրադարձությունների 2-րդ տարին։ Քաղաքական ճգնաժամն արդյոք հաղթահարվե՞լ է։ «7օր»-ի հետ զրույցում «Սարդարապատ» շարժման նախաձեռնող խմբի անդամ, ռեժիսոր Տիգրան Խզմալյանն ասել է, թե ճգնաժամը ոչ թե չի հաղթահարվել, այլ նոր է սկսվել։

-Ժողովրդի մեծ մասը ինչ-որ կարևոր բան հասկացավ՝ մարտի 1-ին պետությունը կրակեց սեփական ժողովրդի վրա, և դա ողբերգական սկիզբ էր, այլ ոչ թե ավարտ։ Այն պատերազմը, որը մենք պատկերացնում էինք դրսում, սկսվեց մեր ներսում։ Դա հոգևոր, քաղաքացիական պատերազմ է, և մարտի 1-ն էլ դրա խորհրդանիշն է,-նշել է նա։

Այն հարցին, թե փոխվե՞լ է արդյոք իշխանությունների վարքագիծը 2008թ. այդ իրադարձությունների օրվանից, Տիգրան Խզմալյանը պատասխանել է, թե եթե չնայենք արտաքին, ձևական կողմին, այլ ավելի խոր, ապա կհասկանանք, որ ոչ։

-Հայաստանում ձևավորվել է խմբապետություն, և դրա բնույթը զուտ դասակարգային է։ Դա խումբ է՝ մոտ 40 ընտանիք, որը սեփականացրեց երկիրն իր ողջ կառուցվածքով՝ բանակով, դատախազությամբ, տնտեսությամբ, և անում է ամեն ինչ, որ պահպանի սեփական իշխանությունը,-ասել է նա։

Ըստ Տիգրան Խզմալյանի՝  պայքարը դասակարգային է, և այդ ռազմաճակատը չի բաժանում իշախնությունն ու ընդդիմությունը, որովհետև ընդդիմության մի մասը հանդես է գալիս նույն դասակարգային դիրքերից։

 -Նույն դիրքերից են, ինչ և իշխանությունը, որովհետև կազմում են նույն դասակարգը և նույն տնտեսական ու գաղափարախոսական խումբը,-հավելել է նա։

7or.am