Փետրվարի 26-ին ՄԱԿ-ում ՀՀ մշտական ներկայացուցիչ, դեսպան Կարեն Նազարյանը հանդիպել է ՄԱԿ-ի գլխավոր քարտուղարի' Մարդասիրական օգնության և արտակարգ իրավիճակների հարցերով տեղակալ Ջոն Հոլմսի հետ:

Հանդիպմանը ՄԱԿ-ի գլխավոր քարտուղարի տեղակալին է փոխանցվել ՀՀ կառավարության կողմից Հայիթիում տեղի ունեցած երկրաշարժի հետևանքների վերացմանն նպատակով ՀՀ պետական բյուջեից հատկացված 100.0 հազար ԱՄՆ դոլար բանկային ծանուցագիրը:

Դեսպան Կարեն Նազարյանը տեղեկացրել է, որ համաձայն ՀՀ կառավարության ընդունած համապատասխան որոշման'հատկացվող գումարը ՄԱԿ-ի Մարդասիրական հարցերի համակարգման գրասենյակի միջոցով ուղղվելու է Հայիթիի երկրաշարժից տուժածների ժամանակավոր կացարանների, ոչ պարենային իրերի, սննդի և առողջապահական կարիքների ապահովմանը: Նա նաև նշել է, որ չնայած առկա ֆինանսատնտեսական դժվարություններին' ՀՀ կառավարությունը մեծապես կարևորել է Հայիթիի երկրաշարժից տուժածներին աջակցության տրամադրումը' հաշվի առնելով Հայաստանի 1988թ.-ի աղետալի երկրաշարժի փորձը և առհասարակ նման իրավիճակում միջազգային հանրության կողմից օգնություն ցուցաբերելու անհրաժեշտությունը:

Գլխավոր քարտուղարի տեղակալը իր հերթին կարևորել է ինչպես Հայաստանի ուղղակի օժանդակությունը, այնպես էլ որպես ՄԱԿ-ի Արտակարգ իրավիճակների կենտրոնական հիմնադրամի դոնոր երկիր անուղղակի մասնակցությունը երկրաշարժի առաջին օրերի ընթացքում:

Պրն.  Հոլմսի խնդրանքով' դեսպան Կ. Նազարյանը տեղեկացրել է 1988թ. երկրաշարժի աղետի գոտում ՀՀ կառավարության կողմից իրականացվող աշխատանքների մասին:

Հանդիպման ժամանակ քննարկվել են նաև հետագա համագործակցության հետ կապված հարցեր: