Փետրվարի 26-ին  Վաշինգտոնի տարածաշրջանի հայ երիտասարդությունը  ոտքի էր ելել իր ընդվզումը հայտնելու 22 տարի առաջ Սումգայիթում տեղի ունեցած ոճրագործության դեմ: Հայ երիտասարդների  դաշնությունը, Ամերիկայի Հայ եկեղեցու երիտասարդական կազմակերպությունը և բազմաթիվ հայ երիտասարդներ, որոնք ներկայացնում էին համայնքի բոլոր թևերը,  մի քանի տասնյակ մարդ, հավաքվել էին Վաշինգտոնում Ադրբեջանի դեսպանության առջև և պահանջում էին դատապարտել  Սումգայիթի ոճիրը:  Նրանց կարգախոսները կոչ էին անում  «Սումգայիթի ցեղասպանությունը ոճիր է մարդկության հանդեպ», «Ազատություն Լեռնային Ղարաբաղին», «Ճշմարտություն Սումգայիթի ոճրագործության մասին», «Սումայիթի հանցագործները ցայսօր անպատիժ են» և այլն:

Ցույցի մասնակիցները, որոնցից շատերը Սումգայիթյան ողբերգության պահին նույնիսկ չէին  ծնվել,  բացականչում էին  «Մենք դատապարտում ենք հայերի ջարդերը Ադրբեջանում»: Նրանք հավատում են, որ Սումգայիթը սկիզբ դրեց Արցախյան ազատագրական պայքարի հետագա արյունալի իրադարձություններին:  Ցուցարարներիը պահանջում էին պատժել Սումգայիթի և դրան հաջորդած Բաքվի, Կիրովաբադի, Շահումյանի, Մարաղայի և այլ հայաբնակ վայրերում ցեղասպանություն կազմակերպած և իրագործած անձանց, դադարեցնել հակահայ իստերիան Հայաստանի և Լեռնային ղարաբաղի նկատմամբ: