«Day.az»-ին տված հարցազրույցում «Ի՞նչ եք կարծում՝ Մինսկի խմբի շրջանակներում ի՞նչ կտա Ղարաբաղի խնդրի կարգավորմանը ԵԱՀԿ-ում Ղազախստանի նախագահությունը» հարցին ԵԱՀԿ նախարարների հանձնաժողովի թուրքական պատվիրակության ղեկավար, «Արդարություն և զարգացում» իշխող կուսակցության պատգամավոր Ալադին Բյուքքայը պատասխանել է.

-Ղազախստանի նախագահության ժամանակաշրջանը կարելի է համարել Ղարաբաղի հարցի լուծման հնարավորության ժամանակաշրջան։ Բնականաբար, այստեղ շատ բան կախված է պաշտոնական Աստանայի կողմից կարգավորմանն ուղղված փորձերի ուժգնացումից և Ղազախստանի հետ խորհրդակցելու կողմերի հետաքրքրվածությունից։ Օգտվելով նախագահությունից՝ Ղազախստանը ցանկության դեպքում կարող է արագացնել Մինսկի խմբի գործունեությունը և աջակցել ղարաբաղյան հակամարտության կարգավորման մեջ հստակ արդյունքների հասնելուն։

ԵԱՀԿ գործող նախագահ Կանատ Սաուդաբաևի Ադրբեջան և Հայաստան կատարած այցի ժամանակ քննարկվել է ԵԱՀԿ Մինսկի խմբում Ղազախստանի մասնակցության հարցը։ Սակայն դուք գիտեք, որ նոր երկրի մասնակցության համար խմբի ձևաչափը պետք է փոխվի. պետք է կա՛մ մեծացնել համանախագահող երկրների քանակը, կա՛մ փոխել համանախագահներին։ Այդ հարցը պետք է որոշվի ԵԱՀԿ նախարարների հանձնաժողովում։ Կարծում եմ՝ ամենաիրական քայլերը հակամարտության լուծման արագացման համար կլինեն Ղազախստանի բանակցությունները Մինսկի խմբի համանախագահող երկրների հետ։