Թուրքիայի պաշտպանության նախարարի պաշտոնում 58 տարի դադարից հետո առաջին անգամ զինվորական է նշանակվել։ Այս պաշտոնը ստանձնած վերջին զինվորականը Ջեմալ Գյուրսելն է եղել (1960թ․), իսկ նրան հաջորդած բոլոր 32 նախարարները եղել են քաղաքացիական անձինք։

Նորանշանակ նախարար Հուլուսի Աքարը Թուրքիայի 60-րդ պաշտպանության նախարարն է։ Ավելի վաղ այս պաշտոնը ստանձնած զինվորականներն էին՝ Ֆևզի Չաքմաքը, Քազըմ Օզալփը, Ֆահրեթթին Օզդիլեքը, Սաֆֆեթ Արըքանը, Ռըզա Արթունքալը, Ջահիթ Թոյդեմիրը, Սեյֆի Քուրթբեկը, Հյուսեյին Աթամանը, Մուզաֆֆեր Ալանքուշը և Ջեմալ Գյուրսելը։

Թուրքիայի ԶՈՒ գլխավոր շտաբի նախկին պետ Հուլուսի Աքարի անունը վերջին շրջանում հատկապես հաճախ սկսեց հնչել նախագահական ընտրություններից առաջ, երբ լուրեր տարածվեցին այն մասին, որ Աքարն ուղղաթիռով այցելել է նախագահի թեկնածու առաջադրված Աբդուլլահ Գյուլին և հորդորել նրան հանել թեկնածությունը։

Երկրում հաստատված նոր կարգով փոփոխվել են նաև Թուրքիայի պաշտպանության նախարարի լիազորությունները։ Այժմ ցամաքային, ծովային և օդային ուժերի հրամանատարությունները ենթակա են անմիջականորեն պաշտպանության նախարարին։ Երկրի ռազմարդյունաբերական գործարանները, նավաշինարանները, ռազմական արդարադատությանն առնչվող հարցերը, ինչպես նաև՝ զորակոչերի ու զինվորագրման հարցերն անմիջական ենթակայություն կունենան պաշտպանության նախարարությանը։

Աղբյուրը՝ ermenihaber.am