Փետրվարի 24-ին «Կոնգրես» հյուրանոցի «Պիկասո» սրահում տեղի ունեցավ «Այլատյացության կանխարգելման նախաձեռնության» կառուցած Xocali.net (www.xocali.net) կայքի շնորհանդեսը:

Շնորհանդեսի ժամանակ ելույթ ունեցան «Այլատյացության կանխարգելման նախաձեռնության» ղեկավար Արմինե Ադիբեկյանը, տեղեկատվական անվտանգության փորձագետ Սամվել Մարտիրոսյանը:

Շնորհանդեսի ընթացքում բանախոսները ներկայացրեցին կայքի առաքելությունը, կառուցվածքն ու զետեղված նյութերի բովանդակությունը: Կայքում զետեղված փաստաթղթերը, վկայությունները, լուսանկարներն ու տեսանյութերը պատմում են Խոջալուի կրակակետերի լռեցման մարտական գործողությունների ու դրանց հետևած իրադարձությունների իրականության մասին: Կայքում զետեղված են նաև փաստեր, որոնք վկայում են ադրբեջանական քարոզչամեքենայի կողմից իրականության խեղաթյուրման, փաստերի աղճատման մասին: Շնորհանդեսի ընթացքում, մասնավորապես ներկայացվեցին, այլ տարածաշրջաններում և այլ ժամանակահատվածում արված մի շարք լուսանկարներ, որոնք ադրբեջանական կողմը ներկաայցնում է որպես Խոջալուի զոհերի պատկերներ: Դրանց թվում ներկայացվեց լուսանկարներ, որտեղ թուրքական Իզմիթ քաղաքում տեղի ունեցած երկրաշարժի զոհ քուրդ երեխաները և բալկանյան հակամարտությունների ժամանակ արձանագրված տեսարանները ներկայացվում են որպես Խոջալուի իրադարձություններ:

Բանախոսների ներկայացմամբ, կայքում ի թիվս բազմաթիվ փաստաթղթերի ու հրապարակումների, զետեղված են նաև ադրբեջանական կողմի ինքնախոստովանական վկայություններն առ այն, որ Խոջալուի իրադարձությունները կազմակերպվել և իրականացվել են ադրբեջանական «Ազգային ճակատի» կողմից:

Xocali.net կայքում զետեղված նյութերը նախատեսված են հանրային լայն շրջանակների համար, որոնք կարող են օգատգործվել նաև ղարաբաղյան հակամարտության ուսումնասիրմամբ զբաղվող մասնագիտական հետազոտությունների դեպքում: Սկզբնական շրջանում կայքը հասանելի է անգլերեն, ռուսերեն և ադրբեջաներեն լեզուներով, առաջիկայում նախատեսվում է գործարկել նաև ֆրանսերեն, գերմաներեն և պարսկերեն տարբերակներով:

                                                  «Այլատյացության կանխարգելման նախաձեռնության»