Պարզվում է, որ մեր խորհրդարանում թեև քիչ  թվով, սակայն կան պատգամավորներ, ովքեր հետևում են կրոնական իրադարձություններին, իսկ տվյալ դեպքում 'մեծ պահքի խորհրդին իր բոլոր կանոններով:

«Ժառանգություն» խմբակցության պատգամավոր Րաֆֆի Հովհաննիսյանը հետևում է մեծ պահքի խորհրդին.

-Մարդ էակը, այդ թվում' ես, թերի արարածներ ենք, դրա համար միշտ չէ, որ կատարելապես իրացնում ենք պատվիրանները: Փորձում եմ ուժերիս ներածին չափով հավատարիմ մնալ թե´ հոգևոր, թե´ ֆիզիկական բոլոր արժեքներին և ուղեցույցներին,-ասել է Ր. Հովհաննիսյանն ու ավելացրել,-միշտ փորձել եմ պահել, սակայն անցյալում պատահել է, որ իմ կամքը չի հերիքել և մինչև վերջ չեմ կարողացել պահել ու շեղում եմ թույլ տվել: Բայց հաջորդ օրն իսկ փորձել եմ նորից վերականգնել, որովհետև կյանքն ինքնին պայքար է: Եվ, իմ կարծիքով, կարևորը ոչ միայն նպատակն է, այլ նաև դեպի նպատակ տանող ճանապարհը:Այդ ճանապարհը պետք է ինքնամաքրման ուղի լինի:

Ազգային ժողովի մարդու իրավունքների պաշտպանության մշտական հանձնաժողովի նախագահ Արամ Սաֆարյանը «7օր»-ի հետ զրույցում ասել է, թե նախկինում թեև ոչ ամբողջությամբ' 7 շաբաթ, սակայն պահք պահել է.

-Իսկ հիմա շատ ուղևորությունների մեջ եմ, իսկ ճանապարհ գնացողներին կարելի է չպահել: Խոսքը միայն կերակրացանկի մասին չէ. գործուղումներում դժվար է հանդարտ մնալը,-ասել է Ա. Սաֆարյանն ու նշել, որ բոլորովին վերջերս ԵԱՀԿ խորհրդարանական վեհաժողովում զայրացել է և զգացմունքային ելույթ ունեցել, ինչի համար ափսոսում է:

«Բարգավաճ Հայաստան» խմբակցության պատգամավոր Հրանտ Մադաթյանը նույնպես հետևում է մեծ պահքին.

-Պահում եմ մեծ պահքը: Միշտ էլ պահել եմ: Ինձ համար մեծ խնդիր չէ չխախտելը: Եթե ցանկություն կա պահելու, ապա մարդ միշտ էլ կարող է: Խորհրդարանի ճաշարանում պահքին համապատասխան կերակուրներ կան, բայց ես ինքս նախընտրեցի չօգտվել: Աշխատանքային օրվա ընթացքում նախընտրում եմ ջուր խմել, իսկ երեկոյան քիչ քանակով ինչ-որ բան եմ ուտում,-«7օր»-ին ասել է Հ. Մադաթյանը: