ԱԺ հայտարարությունների ժամանակ ԱԺ ՀՀԿ խմբակցության պատգամավոր Կարեն Ավագյանը անդրադառնալով երեկ խորհրդարանում տեղի ունեցած միջադեպին՝ ասել է, թե խորհրդարանում որոշ պատգամավորներ «գրիպով» էին վարակված և հայտարարություններ անելով ու փռշտալով' հաստատում էին իրենց ասածի իբրև ճշմարտացիությունը։

-Մարդիկ տենդի մեջ մոռանում են որոշ բաներ։ Մասնավորապես, որոշ մարդիկ փորձեցին մոռացության մատնել, օրինակ, այն հանգամանքը, որ սոցիալական պաշտպանական խնդիրները 9 տարի անընդմեջ վստահված է եղել իրենց քաղաքական ուժին։ Մոռացության են տվել նաև այն հանգամանքը, որ սոցիալական ոլորտների օրենքների ժամանակին կատարման համար և համապատասխան ոլորտի  բյուջեի համար իրենք են պատասխանատվություն կրել կառավարությունում։ Միայն շատ բարձր ջերմությամբ կարելի է չհիշել այն երևույթը, որ շոուի հեղինակներից մեկը հենց ինքն է երեք տարի զբաղեցրել սոցիալական պաշտպանության ոլորտի պատասխանատու պաշտոնը։ Հիվանդության պատմության մեջ առանձին խոսակցության առիթ է նաև այն տարիներին գիտնականների և գիտության նկատմամբ դրսևորած վերաբերմունքը, իսկ ավելի ճիշտ՝ վերաբերմունքի բացակայությունը,-նշել  է նա։

Կարեն Ավագյանը հույս է հայտնել, որ քաղաքական դաշտի «գրիպը» շուտ կանցնի, չնայած, ըստ իրեն,  քաղաքական մրսածության դրսևորումները կշարունակվեն մինչև հաջորդ խորհրդարանական ընտրություններ։

7or.am