-Հարություն Հարությունյանը չի հեռացել Հանրային հեռուստատեսությունից,- «Ազդակ» ակումբում ասել է Հանրային հեռուստառադիո խորհրդի նախագահ Ալեքսան Հարությունյանը։

Նա նշել է, որ Հ. Հարությունյանը երկու պաշտոն ուներ՝ Հանրային հեռուստաընկերության գործադիր տնօրենի տեղակալ և «Հայլուր» լրատվական ծրագրի ղեկավար։ Երկար տարիներ շատ դժվար էր առավոտյան 9-ից, առանց շաբաթ-կիրակիի, ռեժիմով աշխատելը և մի քանի անգամ նա ցանկություն էր հայտնել հանգստանալ այդ գործից։

-Դա իր ցանկությունն էր. նա դիմեց խորհրդին, և հիմա էլ Հարություն Հարությունյանը մեզ մոտ է ու շատ կարևոր աշխատանք է կատարելու։ Նույն սերիալներն ու հեռուստատեսային հաղորդումները, որ մեր եթերում կային, սակայն ընդհանուր կոորդինացիա չկար, այդ գործով հիմա կզբաղվի Հարություն Հարությունյանը,- ասել է Ալեքսան Հարությունյանը։

Ինչ վերաբերում է «Հայլուր» լրատվական ծրագրի ղեկավարի պաշտոնին, Ա. Հարությունյանը նշել է, որ նոր թեկնածուներ չկան, կա գլխավոր խմբագիր՝ Արմեն Ամիրխանյանը, և գլխավոր պրոդյուսեր՝ Արտակ Ալեքսանյանը, ինչպես նաև Արթուր Գրիգորյանը. «Կարծում եմ՝ մոտ ապագայում այդ խնդիրն իր լուծումը կստանա»։

7or.am