-Չափորոշիչները, որոնք հաստատվեցին, և ընդհանրապես այն գործընթացը, որը բավական ակտիվ քննարկումների տեսքով ընթանում է, շատ դրական են։ Կարծում եմ՝ մեկ-երկու տարում դրանք մեր հեռուստատեսային դաշտին բավական մեծ օգուտներ կտան,- «Ազդակ» ակումբում ՀՌԱՀ սահմանած չափորոշիչների մասին խոսելիս ասել է Հանրային հեռուստառադիո խորհրդի նախագահ Ալեքսան Հարությունյանը։

Նա նշել է, որ այս գործընթացը միայն Հայաստանում չէ, որ եղել է. դա տեղի է ունեցել նաև Ռուսաստանում մի քանի տարի առաջ. «Ռուսաստանում ևս իշխանությունը, տեսնելով, որ եթե այդ գործընթացում կարգավորումներ չմտցվեն, ինչ կարող է լինել, նման միջոցների դիմեց։ Այսօր դուք Ռուսաստանի առաջին ալիքով չեք տեսնի «Բրիգադա», «Կլոն» և այլն»։

Նրա կարծիքով ամեն ինչ ճիշտ է, և առաջացած խնդիրներն ու թյուրըմբռնումներն ընթացքում կկարգավորվեն։

Առաջիկա ծրագրերին անդրադառնալով՝ Ալեքսան Հարությունյանն ասել է, որ Հանրային հեռուստաընկերության եթերում կլինեն սերիալներ, որոնք, սակայն, մտավորականության և հասարակության կողմից բացասական ռեակցիա չեն առաջացնի։ Ինչ վերաբերում է արտասահմանյան ֆիլմերին, որոնց մեջ թեև էրոտիկայի և սարսափի էլեմենտներ կան, սակայն բարձրարժեք ստեղծագործություններ են, դրանց համար կլինի հատուկ ժամ՝ գիշերվա 12-ից հետո։ Եթերների հումորը պետք է ձևափոխվի և վերածվի այնպիսի հումորի, որում չեն լինի գռեհկություն և ազգային արժեքների ոտնահարում։

Նա նշել է նաև, որ քաղաքական հաղորդումների շարքում նոր հաղորդում կլինի արտաքին քաղաքական հարցերի վերաբերյալ, որը կվարի Կարեն Բեքարյանը, Արթուր Բախտամյանի հաղորդումը կլինի, որտեղ ամեն օր կքննարկվեն տարբեր թեմաներ։

7or.am