Ինչպես արդեն տեղեկացրել էինք, «Հայէկոնոմբանկի» խորհրդի նախագահ Սարիբեկ Սուքիասյանի դեմ մեղադրանք է առաջադրվել ՀՀ քր. օր. 133-րդ հոդվածի 2-րդ մասի 1-ին և 7-րդ կետերով, որի տակ նա հրաժարվել է ստորագրել։

«7օր»-ի հետ զրույցում Սարիբեկ Սուքիասյանի փաստաբան Լուսինե Սահակյանն ասել է, թե այդ հոդվածով առաջադրված մեղադրանքը հետևյալն է՝ շահադիտական դրդումներով անձին ազատությունից զրկել կազմակերպված խմբի միջամտությամբ։

-Իբրև թե շահադիտական նպատակներով մարդուն ազատությունից զրկել են, բայց ապօրինի մեղադրանք է առաջադրված, ուստի մենք ձեռնարկելու ենք որոշակի գործողություններ։ Իհարկե պատրաստվում ենք բողոքարկել, սակայն պաշտպանական նկատառումներից ելնելով՝ հիմա չենք  կարող ասել, թե կոնկրետ ինչ գործողություններ ենք ձեռնարկելու,-ասել է նա։

Նրա խոսքերով՝ գործի շարունակությունը նախաքննական մարմինն է իրականացնում։

Հիշեցնենք, որ փետրավրի 12-ին մի քանի տասնյակ ոստիկաններ ներխուժել են «Սիլ կոնցեռնի» գրասենյակ և «Հայէկոնոմբանկի» խորհրդի նախագահ Սարիբեկ Սուքիասյանին և մի քանի աշխատակիցների հրավիրել ոստիկանության Էրեբունու բաժանմունք, այնուհետև, մի քանի օր ոստիկանությունում պահվելուց հետո, երկրից չբացակայելու պայմանով ստորագրությամբ Սարիբեկ Սուքիասյանն ազատ էր արձակվել։

7or.am