ՀՀ ոստիկանության Երևան քաղաքի վարչության պետ, ոստիկանության գեներալ-մայոր Ներսես Նազարյանը լրատվամիջոցների հետ հանդիպմանը ներկայացրել է իր ղեկավարած կառույցի կողմից 2009-ին կատարված աշխատանքները։

-Հաշվետու ժամանակաշրջանում մայրաքաղաքում արձանագրվել է հանցագործությունների աճի միտում։ Ընդհանուր թվով գրանցվել է 7026 հանցագործություն, որը 2210-ով ավելի է նախորդ տարվանից։ Դեպքերի աճը տեղի է ունեցել հիմնականում սեփականության և անձի դեմ ուղղված հանցագործությունների հաշվին,-ասել է Ն. Նազարյանն ու ավելացրել, թե զգալի բարելավվել է հրազենի ապօրինի շրջանառության դեմ պայքարի վիճակը։

-Սակայն հրազենով կատարված հանցագործությունների աճի պարագայում այդ ցուցանիշները դեռևս բավարար համարել չի կարելի։

Երևան քաղաքի վարչության պետն ասել է, որ տարվա ընթացքում ակտիվացել է թմրամոլության դեմ իրականացվող պայքարը, որի արդյունքում ցուցանիշներն աճել են 229-ով.

-Հարկ է նշել, որ կապված թմրանյութերի իրացման դեպքերի աճի հետ՝ նվազել է նրանց բացահայտման ցուցանիշը։

7or.am