Մամուլի ազգային ակումբում լրագրողների հետ հանդիպման ժամանակ ղարաբաղյան հակամարտության կարգավորման հարցին անդրադառնալով՝ Հայաստանում Իրանի դեսպան Սեյիդ Ալի Սաղայանն ասել է՝ Իրանը հենց հակամարտության սկզբից մշտապես իր ջանքերն է ներդրել հակամարտությունում հրադադարի հաստատման մեջ։

-Իրանը մշտապես կողմ է եղել և մշտապես ջանքեր գործադրել, որ խնդիրը կարգավորվի կողմերի միջև երկխոսության և փոխըմբռնման միջոցով։ Դրա հետ մեկտեղ մենք մշտապես ողջունել ենք խնդրի կարգավորման ուղղությամբ միջազգային ջանքերը, այդ թվում ԵԱՀԿ ՄԽ շրջանակներում,- նշել է դեսպանը։

Ղարաբաղյան հակամարտության լուծման տարբերակներին անդրադառնալով՝ նա նշել է, որ իր լիազորությունների շրջանակում չէ դրա վերաբերյալ կարծիք հայտնելը, քանի որ խնդրի կարգավորման բանակցություններն ընթանում են ՀՀ նախագահ Սերժ Սարգսյանի և Ադրբեջանի նախագահ Ալիևի միջև։

Այդուհանդերձ, ազատագրված տարածքներում խաղաղարար ուժերի տեղակայման վերաբերյալ (հաշվի առնելով, որ միակ պետությունը, որ Ղարաբաղի հետ ընդհանուր սահման ունի ԻԻՀ-ն է) Իրանը մշտապես ունեցել է և ունի իր տեսակետը։

Հայաստանի և Ադրբեջանի միջև պատերազմի վերսկսման հավանականությանն անդրադառնալով՝ Սեյիդ Ալի Սաղայանն ասել է.

-Ոչ մի ցանկություն չունեմ, որ նման բան տեղի ունենա, և կողմ եմ, որ հարցը կարգավորվի երկխոսության շրջանակներում։ Իմ անձնական կարծիքն այն է, որ ես բացառում եմ պատերազմի վերսկսումը։  

7or.am