Հարցազրույց ՀՀ բնապահպանության նախկին նախարար, այժմ ՀՀ ԱԺ տնտեսական հարցերի մշտական հանձնաժողովի նախագահ Վարդան Այվազյանի հետ

-«Wikileaks»-ը հրապարակել է մի փաստաթուղթ, որտեղ ամերիկյան դիվանագետները պատմել են, թե 2005թ., երբ դուք Հայաստանի բնապահպանության նախարարն էիք, ոսկի արդյունահանող «Global Gold Corporation» միջազգային կազմակերպությունից 3 մլն դոլար կաշառք եք պահանջել՝ այդ մասին հայտնելով «Global Gold Corporation»-ի իրավաբան Աշոտ Պողոսյանին: Նշվում է նաև, որ այդ մասին տեղյակ են եղել ՀՀ իշխանական բարձր ատյաններում: Ինչպե՞ս կմեկնաբանեք այս հրապարակումը:

-Եթե այդքան կամք ունենան, թող կես բերան հայտարարեն, որ Այվազյան Վարդանը կաշառք է ուզել:

-Ո՞վ հայտարարի:

-Նույն «Global Gold»-ն ասի այն, ինչ «Wikileaks»-ի մեջ գրված է, նույնը, ով տպագրել է այս նյութը: Եթե իրենք կարող են հայտարարել, որ ասենք Այվազյան Վարդանն այդպիսի բան է արել, որ թե գրեն, որ մենք ըստեղից կարդացել ենք, լսել ենք, Էվանսն ասել է... Հայ-ամերիկյան հանձնաժողովի ժամանակ, եթե ես չեմ սխալվում, խոչընդոտել հասկացողությունը կար, թե մենք իրենց, այսպես ասած, խոչընդոտում ենք, որ իրենք իրենց հանձնարարականները չեն կատարել:

-Այսինքն, պնդում եք, որ դուք այդ ընկերությունից կաշառք չեք ուզել:

-Հիմարի նմա՞ն եմ:

-Ինչո՞ւ, կաշառք վերցնելը հիմարությա՞ն նշան է:

-Միանշանա՛կ: Որովհետև եթե դուք տեսնեք այդ մարդկանց, կարող եք այդպես ասել:

-Կարծում եք, որ իրենք այդ համարձակությունը չե՞ն ունենա հայտարարելու, որ կաշառք եք պահանջել:

-Թող ասեն, որ Այվազյան Վարդանը կաշառք է ուզել, ես միանգամից դատի եմ տալու, նո՛ւյն վայրկյանին: Աշոտ Պողոսյանն ասում է՝ ես գրավոր նյութ պետք է ներկայացնեմ: Ինձ թվում է, որ որևէ մեկն իրեն չի խանգարում թեկուզ հիմա գրավոր կամ ձայնագրությունը ներկայացնի: Ի՞նչ կա խանգարող: Իրենք ասում են՝ մենք ունենք ձայնագրած նյութ, իսկ հայ-ամերիկյան համաձայնագրի քննարկումներն արձանագրվում են ոչ թե մեկ, այլ երկու տեղ: Կարող եք արձանագրությունների հետ ծանոթանալ, խնդիր չկա:

-Տարօրինակ չե՞ք համարում, որ, փաստորեն, ձեզանով սկսել է հետաքրքրվել ԱՄՆ պետքարտուղարությունը, և «Wikileaks»-ի միջոցով այդ տեղեկատվական արտահոսը տարածվում է:

-Ես չգիտեմ: Ես չգիտեմ՝ ինչ փաստաթղթեր են իրենք հրապարակել, և այդ փաստաթղթերի ի հայտ գալն էլ հարց է, թե «Wikileaks»-ն ինչո՞ւ է հայտարարում, ինչե՞ր է ներկայացնում, ո՞վ է անում: Աստված իրենց հետ: Դրանից հետո ես բազում անգամ եղել եմ թե՛ ԱՄՆ-ում, թե՛ բոլոր պաշտոնական հանդիպումներում: Գիտեմ, որ ԱՄՆ-ն այնքան լուրջ երկիր է, որ մեկին, որին մեղադրում են կաշառք ուզելու մեջ, իրենց երկիր մտնել հետագայում թույլ չեն տալիս, որպեսզի մասնակցի քննարկումներին կամ հանդիպումներին:

-Իսկ չե՞ք կարծում, որ ընդհանրապես ձեր գլխին սև ամպեր են կուտակվում:

-Ինչի՞ համար:

-Վերջին շրջանում շատ են Ձեր մասին հիշում, Ձեր վերաբերյալ այդպիսի հայտարարություններ անում:

-Ի միջի այլոց, միշտ էլ իմ մասին այդպես հայտարարում են. մե՛կ այսպես են հայտարարում, մե՛կ այնպես: Չեմ կարծում, որ ինչ-որ սև ամպեր են կուտակվում: Իսկ ինչո՞ւ պետք է սև ամպեր կուտակվեն: Ի՞նչն է դրդապատճառը, որ սև ամպեր կուտակվեն: Սև գործերի՛ համար են սև ամպեր կուտակվում: Ես որևէ սև գործ չեմ արել կամ էլ որևէ մի բան չեմ արել, որ իմ արած գործերի համար ամաչեմ՝ իմ երեխաների, իմ ժողովրդի նկատմամբ էլ: Իսկ ընդհանրապես, շատ լավ կլինի, որ այս բամբասանքների սուտը՝ շարունակությունը, ոտքը, գոնե մի քիչ կարողանա պատասխանի, թեկուզ սեփական խղճի առաջ: Էդ բամբասանք անողը գոնե մի անգամ կարողանար պատասխան տար: Ա՛յ, օրինակ, ես կուզենայի, որ այս նույն մարդն ասեր, որ ես կաշառք եմ տվել. վեր կենար, հրապարակավ ասեր՝ դու ինձանից ուզել ես, կամ այդ գրավոր հիմքերը ներկայացներ:

-Իսկ չե՞ք կարծում, որ մեր երկրի իշխանությունների հետ համաձայնեցված է եղել այս արտահոսքը:

-Բացարձակապես ո՛չ: Բացարձակապե՛ս:

Հարցազրույցը վարեց Արեգնազ Մանուկյանը