-Այսօր հեռուստատեսությունը կայտառ ու աշխույժ հայրենադավություն է քարոզում,- արցախյան պատերազմում զոհված ազատամարտիկ Պետրոս Ղևոնդյանի մահվան տարելիցի կապակցությամբ հրավիրված ասուլիսում հայտարարել է նրա մարտական ընկեր Պավել Մանուկյանը։

Վերջին ժամանակահատվածում հաճախակի են խոսակցություններ պտտվում, թե մեծացել է պատերազմի հավանակությունը։ Հարցին, թե հնարավոր պատերազմի դեպքում իրենք կրկին կելնե՞ն մարտի, երկրորդ կարգի հաշմանդամ ազատամարտիկ, Ստեփանակերտի թիվ 6 դպրոցի ռազմագիտության ուսուցիչ Արմեն Մարտիրոսյանը պատասխանել է.

-Ես միշտ պատրաստ եմ մարտը շարունակել մինչև վերջ։ Ինչո՞ւ պետք է հողերը հենց այնպես տանք ադրբեջանցիներին։

Նույն հարցին պատասխանելիս Պավել Մանուկյանն ասել է.

-Եթե հանկարծ ադրբեջանցիները փորձեն պատերազմ սկսել, ուրեմն մենք բացթողում ենք արել։ Համենայնդեպս, այսօրվա իշխանությունները շատ լավ հիշում են հայր Ալիևի՝ այդ խոշոր աղ լիզողի միտքը՝ «Հողից մի մասնիկ չեն տալիս, հողն արյունով են վերցնում»։ Մենք ոչ թե վերցրել, այլ ազատագրել ենք, իսկ եթե իրենք խոսում են տարածքային ամբողջականությունից, մենք շատ շնորհակալություն ենք հայտնում, քանի որ Արցախը վերջանում է Շամախիում. այս անգամ երկրորդ սխալը չենք անի։ Արցախը կզատագրենք իր պատմական սահմանով։ Բայց պատերազմի հավանականությունը 50/50 էլ չեմ համարում։

7or.am