«Հայելի» ակումբում լրագրողների հետ հանդիպման ժամանակ գնահատելով նախագահ Սերժ Սարգսյանի լոնդոնյան ելույթը՝ Հայաստանի Հանրապետական կուսակցության վերլուծաբան Մենուա Հարությունյանն ասել է, որ այն բավական լավն էր, և նախագահը փորձեց հասկացնել եվրոպական հանրությանը, որ այսօր Արցախն ապրում է ժողովրդավարական արժեքներով.

-Իմ կարծիքով նախագահի ելույթը փայլուն էր. նա տվել է հարցերի պատասխաններ, որ Եվրոպան պետք է ստանար, որովհետև Եվրոպայի համար երկակի ստանդարտներն արդեն սովորույթ են դարձել։ Մի կողմից նրանք ասում են ժողովրդավարություն, մյուս կողմից՝ սուլթանական Ադրբեջանին ընդունում որպես Եվրախորհրդի լիիրավ անդամ, ինչն աբսուրդ է,- ասել է նա։

Նա նշել է, որ վստահ է, որ այսօր Արցախն անգամ ավելի ժողովրդավար պետություն է, քան Հայաստանն ու Ադրբեջանը։

Նա նաև նշել է, որ ծիծաղելի է համարում այն խոսակցությունները, որ միջազգային ճնշում կարող է լինել Լեռնային Ղարաբաղի հարցի կարգավորման գործընթացում. «Հայաստանում չկա մի մարդ, և չի կարող լինել մի նախագահ, որի վճիռը կամ որոշումը լինի այնպիսին, որը չի բխի Լեռնային Ղարաբաղի և Հայաստանի շահերից, հետևաբար բոլոր ճնշումները, կարծում եմ, անիմաստ են»։

Նա նշել է, որ գործընթացում հաջողելու դեպքում սահմանը կբացվեր, Հայաստանը կունենար դիվանագիտական հարաբերություններ, ինչը կնպաստեր բիզնեսի զարգացմանը.

-Եթե գործընթացը չհաջողվի, խոշոր հաշվով կարծում եմ՝ նորից ոչինչ չենք կորցնում։ Ռոբերտ Քոչարյանն ապացուցեց, որ սահմանը փակ վիճակում էլ Հայաստանը կարող է զարգանալ։ Սակայն գործընթացը պետք էր սկսել, և այն այսօր էլ չի կարելի փակուղային համարել։

7or.am