Այսօր հրավիրված մամուլի ասուլիսի ժամանակ «7օր»-ի թղթակիցը ՀՅԴ Հայ Դատի և քաղաքական հարցերի գրասենյակի պատասխանատու Կիրո Մանոյանի կարծիքն է ճշտել այն մասին, թե ինչո՞ւ Հայաստանն ու Ադրբեջանը չեն ներկայացնում Լեռնային Ղարաբաղի խնդրի վերաբերյալ իրենց առաջարկները, այն դեպքում, երբ դրա համար հունվարի 25-ին Սոչիում սահմանված երկշաբաթյա ժամկետն արդեն ավարտվել է։

-Ինքան ես հիշում եմ, առաջին անգամն էր, որ Մինսկի խմբի համանախագահող երկրներն իրենց իրավունք էին վերապահել Հայաստանին ու Ադրբեջանին ժամկետ դնել, որ՝ այսքան ժամանակվա մեջ ձեր տեսակետները պետք է հայտնեք։ Պարզ է, որ ինքն իրեն հարգող ցանկացած պետություն չի ենթարկվի նման ժամկետների. ո՞վ եք  ու ի՞նչ ժամկետ եք տալիս,- պատասխանել է Կ. Մանոյանը։

Նա նաև նշել է, որ Հայաստանն այսօր արդեն պետք է հայտարարի, որ Թուրքիան տապալել է հայ-թուրքական հարաբերությունների կարգավորման գործընթացը՝ այդպիսով իսկ Թուրքիային զրկելով ղարաբաղյան խնդրում դերակատարություն ունենալու հնարավորությունից.

-Թուրքիայի ձեռքին այս արձանագրությունները դարձել են ղարաբաղյան հարցում դերակատար լինելու լծակ, և այն օրը, որ ասվի, թե արձանագրությունների հարց այլևս չկա, պարզ է, որ Թուրքիայի այդ լծակը ևս մեջտեղից դուրս կգա։

7or.am