Այսօր «Էրեբունի» հյուրանոցում տեղի է ունեցել «Հայ-թուրքական հարաբերություններ և միջսահմանային ռեգիոնալիզմ» թեմայով քննարկում, որին մասնակցել են ՀՀ վարչապետ Տիգրան Սարգսյանը, Հայաստանում ԱՄՆ-ի դեսպան Մարի Յովանովիչը, Թուրքիայից ժամանած տնտեսագետներ։ Ելույթի իր խոսքում Մարի Յովանովիչը մասնավորապես ասել է. «Մենք հույս ունենք, որ հայ-թուրքական արձանագրությունները կվավերացվեն երկու երկրների խորհրդարանների կողմից»։ ՀՀ-ում ԱՄՆ-ի դեսպանը հիշեցրել է, որ դեռևս 18 ամիս առաջ Հայաստանի նախագահի նախաձեռնությամբ մեկնարկած այս գործընթացը դրական է գնահատվել Միացյալ Նահանգների կողմից, և վերջինս աջակցել ու աջակցելու է հայ-թուրքական հարաբերությունների նորմալացման գործընթացին։ «7օր»-ը Մարի Յովանովիչից փորձել է ճշտել, թե ԱՄՆ-ը ե՞րբ է ակնկալում արձանագրությունների վավերացումն, ու «ողջամիտ ժամկետներ» ասվածը ի՞նչ ժամանակահատված է ենթադրում։ ՀՀ-ում ԱՄՆ-ի դեսպանը, սակայն, բավարարվել է «Next time» դիվանագիտական պատասխանով։

7or.am