Լոնդոնի «Չեթըմ հաուս»-ում ՀՀ նախագահ Սերժ Սարգսյանի ելույթի մասին «Հենարան» ակումբում խոսելիս ՀՀ ՊՆ հանրային խորհրդի անդամ, ռազմական հոգեբան Դավիթ Ջամալյանը կարևորել է այն հանգամանքը, որ նախագահն իր ելույթում նշել է Նախիջևանի մասին։ Այդ հանգամանքը նա կարևորել է, քանի որ հաճախ ենք լսում, թե աշխարհը պատմական արդարությունը չի ընդունում, սակայն պետք է հաշվի առնել, որ նա այդքան էլ տեղեկացված չէ այդ խնդիրների արմատներին։

Նա նշել է, որ մեր դիվանագիտական պայքարում իբրև կռվան  հանդես է գալիս այն փաստարկը, որ Արցախն Ադրբեջանի կազմում անխուսափելիորեն հայաթափվելու է, սակայն եվրոպական հանրությանը հարկավոր էր նաև շատ դիպուկ և մատչելի օրինակ բերել, և այդ օրինակը բերվեց։

-Կարծում եմ, դահլիճում ներկա գտնվողներից շատ քչերը գիտեին, որ Նախիջևանը ժամանակին եղել է հայաբնակ և հայաթափվել է։ Եվ Նախիջևանը, փաստորեն, ծառայեց այն վառ օրինակը, թե ինչ կարող է լինել Արցախի հետ, եթե ադրբեջանական տեսակետը երբևէ հաղթանակի,- ասել է Դ. Ջամալյանը։

Նա նշել է, որ որպեսզի աշխարհը հակամարտության բուն ընթացքն ու ծագումնաբանությունը լավ պատկերացնի, հարկավոր է օգտագործել միջազգային ցանկացած հեղինակավոր ամբիոն. «Ադրբեջանական հակաքարոզչությանը հակազդելու համար, ըստ էության, ցանկացած ամբիոն նպաստավոր է»։

7or.am