Լրագրողների հետ հանդիպման ժամանակ անդրադառնալով Աստանայում կայացած ԵԱՀԿ գագաթնաժողովի ժամանակ Ղարաբաղի խնդրին առնչվող դրվագներին՝ ԱԺ ՀՀԿ խմբակցության պատգամավոր Գագիկ Մելիքյանն ասել է, թե մենք ստացանք այն, ինչի որ սպասում էինք:

-Նախագահ Սարգսյանի ելույթը  բացառիկ կարևոր էր իր էությամբ։ Ամբողջ աշխարհին, ի լուր բոլորի հայտարարվեց այն, ինչ սպասվում է մեզ, եթե բանակցությունները տապալվեն, կամ կողմերը համաձայնության չգան,-ասել է նա։

Նրա խոսքերով՝ Սերժ Սարգսյանի այն հայտարարությունը, թե Ադրբեջանի կողմից ռազմական ագրեսիայի դեպքում Հայաստանը կճանաչի ԼՂՀ անկախությունը, մեր կողմից հնչեցված սպառնալիք չէր:

-Խիստ կարևորում եմ այն հանգամանքը, որ Աստանայում բանակցային կողմերը, եռանախագահները, դրսևորեցին միակարծություն, միասնականություն բանակցային գործընթացի սկզբունքների առումով՝ ի լուր  բոլորին հայտարարելով, որ ռազմական ճանապարհով խնդրի լուծումն անընդունելի է բոլորի համար,-նշել է նա:

Գագիկ Մելիքյանը նաև հավաստիացրել է, որ Աստանայում տեղի ունեցածը մեր արտաքին քաղաքականության հաղթանակներից մեկն էր:

7or.am