«Ելնելով երկու երկրների միջև առևտրա-տնտեսական հարաբերութիւնները զարգացնելու համար գոյություն ունեցող բարենպաստ ֆոնը՝ ԻԻՀ-ում ՀՀ դեսպանութեան առաջարկով՝ Թեհրանում կազմակերպւում է «ARMEX 2010» խորագիրը կրող տնտեսական խորհրդաժողովը, որի անցկացման անհրաժեշտությունը թելադրված է այն իրողությամբ, որ երկու երկրներում առկա առևտրա-տնտեսական հարաբերութիւնները կարգավորող իրավա-տնտեսական ակտերը մեծամասամբ անծանոթ են Հայաստանի և Իրանի տնտեսվարող սուբիեկտներին ու գործարարների լայն շրջանակին: Իրանական շուկան, իր տարողունակ հնարաւորություններով, շատ հաճախ անհասանելի է հայաստանցի գործարարին: Իսկ Հայաստանի լիբերալացված շուկան, միջազգային կազմակերպությունների առջև նրա ստանձնած պարտավորությունների բերումով, հարաբերութիւնների որոշակի պայմաններ է թելադրում օտարերկրյա կապիտալի ներգրավման համար»,- խոսելով Իրանում վաղը մեկնարող «ARMEX 2010» տնտեսական  խորհրդաժողովի մասին՝ նշել է ԻԻՀ-ում Հայաստանի արտակարգ եւ լիազոր դեսպան Գրիգոր Առաքելյանը:

Խորհրդաժողով-սեմինարն անցկացվելու է փետրւարի 9-10-ը՝ Թեհրանի հեռուստա-ռադիոյի պետական կոմիտեի խորհրդակցությունների դահլիճում, որը նախատեսւած է շուրջ 600 հոգու համար: Իրանական կողմը, ի դէմս «Նասլե նո» կազմակերպության, որը մասնագիտացված կառույց է, մեծ ջանքեր է գործադրում խորհրդաժողովի անցկացումը պատշաճ մակարդակով կազմակերպելու հարցում: Խորհրդաժողովի անցկացման շահագրգիռ գերատեսչություններն են՝ ԻԻՀ արտաքին գործերի, առևտրի, ճանապարհների ու հաղորդակցութեան նախարարությունները, ինչպէս նաև՝ Իրանի առևտրա-արդյունաբերական պալատը:

Խորհրդաժողովին մասնակցելու նպատակով՝ Հայաստանից ժամանելու է բարձրաստիճան պատւիրակություն, որը գլխաւորելու է ՀՀ նախագահի տնտեսական հարցերով գլխավոր խորհրդական Վահրամ Ներսիսյանցը: Պատվիրակութեան կազմում են՝ ՀՀ կապի եւ տրանսպորտի նախարարը, էկոնոմիկայի փոխնախարար Արա Պետրոսյանը, գյուղատնտեսութեան փոխնախարար Սամվել Գալստյանը, Զարգացման հայկական գործակալութեան գլխավոր տնօրեն Ռոբերտ Հարությունյանը, այլ պաշտոնատար անձինք, ինչպէս նաև՝ մեծ թվով գործարարներ:

Հայաստանցի գործարարները ցանկություն են հայտնել հանդիպել ու բանակցել իրանցի գործընկերների հետ: Նրանց հետաքրքրության ոլորտներն են՝ սննդամթերք, տպագրություն եւ փաթեթավորում, դեղորայք, բժշկական սարքեր, մեքենաշինություն, շինանյութ, ջեռուցման միջոցներ, հանք, շինարարական սարքեր, առևտուր և այլն:

«ԱԼԻՔ» օրաթերթ, Թեհրան