«7օր»-ի տեղեկություններով՝ վերջին մի քանի օրերին ԼՂՀ-ի և Ադրբեջանի շփման գծում փոխհրաձգությունն ինտենսիվացել է, և հայկական կողմից նույնիսկ մեկ զոհ ու վիրավոր կա։ Այս կապակցությամբ ՀՀ պաշտպանության նախարարության հասարակայնության հետ կապերի վարչության պետ Սեյրան Շահսուվարյանը «7օր»-ին ասել է, որ հայ-ադրբեջանական սահմանի վրա՝ Իջևանի հատվածում, փոխհրաձգության ակտիվացում չկա։

-Փոխհրաձգություններ միշտ էլ եղել են։ Առանձնապես ոչ մի փոփոխություն չկա։ Նույն վիճակն է,- տեղեկացրել է Ս. Շահսուվարյանը։

ԼՂՀ պաշտպանության բանակի հասարակայնության հետ կապերի վարչության պետ Սենոր Հասրաթյանն էլ «7օր»-ին փոխանցել է, որ զոհի և վիրավորի մասին տեղեկությունները չեն համապատասխանում իրականությանը, իսկ շփման գծում իրավիճակն անփոփոխ է։

-Հակառակորդն իր սովորության համաձայն շփման գոտու տարբեր հատվածներում հրաձգային զենքերով պարբերաբար խախտում է հրադադարի ռեժիմը։ Ղարաբաղյան պաշտպանության բանակի դիրքապահներն անհրաժեշտության դեպքում պատասխանում են հակառակորդին և լռեցնում։ Ղարաբաղյան առաջնագծում տիրող իրավիճակը վստահաբար վերահսկվում է Պաշտպանության բանակի մարտական հերթապահություն իրականացնող անձնակազմի կողմից,- նշել է Ս. Հասրաթյանը։

7or.am