Թուրքիայի արտաքին գործերի նախարար Մևլութ Չավուշօղլուն Ռուսաստանից պահանջել է իրենց արտահանձնել Թուրքիայի կոմունիստական «Ժողովրդական ազատագրական կուսակցություն-ճակատի» (DHKP-C) անդամ Միհրաչ Ուրալին:

Վերջինս Սոչիում մասնակցել էր Սիրիայի հարցով կոնգրեսին: Իսկ DHKP-C-ն Թուրքիայում համարվում է ահաբեկչական կազմակերպություն: Ուրալը Թուրքիայում մեղադրվում է 2013թ. Հաթայ նահանգի Ռեյհանլը շրջանում տեղի ունեցած ահաբեկչության մեջ: Ահաբեկչության ժամանակ սպանվել էր 52 մարդ:

«Նախապես այդ ահաբեկիչը չկար ցուցակում, որը մեզ փոխանցել էր Ռուսաստանը: Մենք արձագանքեցինք դրան և պահանջեցինք, որ Ռուսաստանն այդ ահաբեկչին կալանավորի և արտահանձնի մեզ: Մեր պահանջը նաև տեղ է գտել ծանուցագրում, որը փոխանցվել է Ռուսաստանին», -ըստ թուրքական «NTV» լրատվամիջոցի՝ ասել է Թուրքիայի արտգործնախարարը:

Նա նաև անդրադարձել է Ֆրանսիայի նախագահ Էմանուել Մակրոնի այն հայտարարությանը, որ Աֆրինում Թուրքիայի գործողությունները չպետք է վերածվեն օկուպացիայի:

«Ֆրանսիացիները այդ հարցում մեզ չեն կարող դաս տալ: Դա օկուպացում չէ»,- պատասխանել է Չավուշօղլուն:

Աղբյուրը` Ermenihaber.am